Daxuyaniya Koordînasyona KJK’ê bi vî rengî ye:
“Gotinên qirêj, gemarî, şoven û mêrê serwer ên ku herî dawî qaşo parlamenterê ÎP’ê Tûran Çomez û qaşo serokê ÎP’ê li hemberî Rêber Apo gotin, encamek ji mejiyê dijminatiya sed salî ye. Weke KJK em van gotinên rezîl ti carî qebûl nakin, bi tundî şermezar dikin. Rêber Apo weke ku bi derziyê bîrê bikole bi ked û têkoşîneke mezin hewl dide pêvajoya Aştî û Civaka Demokratîk bi pêş ve bibe, gelên Tirkiyeyê, gelê Kurd, jin û zarokan dixe nava aramiyê. Li hemberî vê çand û rêbaza siyaseta mêr ê serwer, nijadperest û şoven ku sed sal in li hemberî gelan, li hemberî gelê Kurd û jinan dijminatiyê dike, Rêber Apo alternatîfeke demokratîk a gelekî bi wate diafirîne. Hewldana têkbirina van hewldanên ji bo demokrasî û aştiyê, sorkirina dijminatiyê û israra li ser nêzîkatiya dijberîkirinê tê wateya pêlîstina bi çarenûsa gelên Tirkiyeyê yê 82 milyon mirovî û gelê Kurd ê 60 milyon mirovî. Mafê kesî nîne ku bi paşeroja mirovan, bi paşeroja jin û zarokan bilîze, mafê kesî nîne ku vê yekê bike qurbanê berjewendiyên xwe yên şexsî. Yên weke Tûran Çomez û Dervîşoglû rantxur in ku xwe ji xwînê û şer xwedî dikin. Ev zanin ku dema şer qediya û aştî hat wê ranta wan jî ji holê rabe, zerar bigihêje berjewendiyên wan ên şexsî, lewma weke dînamîka darbeyê tevdigerin. Mejiyê wan ê darbekar, komploger, dijminê jin û gelan ti carî demokrasiyê, aştiyê, xwişk û biratiyê qebûl nake.
SORKIRINA DIJBERIYA LI RÊBER APO TI CARÎ NAYÊ QEBÛLKIRIN
Piştî ku li Meclîsê ji bo mîmarê aştiyê ya tevgera jinê ji bo Rêber Apo dirûşma ‘Bijî Serok Apo’ hate qîrîn, pêleke dijberiya li Rêber Apo, dijberiya li Kurdan û jinan hate rakirin. Xwedîderketina li Rêberekî ku aştiyê diafirîne û gavên mezin ên wêrekî di vê oxirê de diavêje, qîrîna dirûşman ji bo wî gelo ne bi dilê kê ye, kê aciz dike? Di vir de çi sûc heye? Eger ev dewlet wê aştiyekê pêk bîne, hingî xwedîderketina li Rêberê aştiyê, qîrîna dirûşman ji bo wî, çima wê bibe sûc? Çalakî û daxwazeke li ser bingeha demokratîk e. Lê belê li hemberî vê yekê sorkirin û geşkirina dijberiya li Rêber Apo, dijberiya li kurdan û jinan ti carî nayê qebûlkirin.
HEWLDANA JI BO SABOTEKIRINA PÊVAJOYÊ YE
Helwestên bêhurmet, dijminane û mêranî yên li dijî Serokwekîla Meclîsê û endama Şandeya Îmraliyê birêz Pervîn Buldan, hem li dijî jinek û hem jî li dijî raye herî bilind a TBMM’ê weke heqeretek e. Ev yek sûce û mijara lêpirsînê ye. Em weke tevgera jin heqaretên li dijî birêz Pervîn Buldan û di şexsê wê de li ser Rêber Apo qebûl nakin û van helwestan wekî sûcê teşwîqkirina şer binav dikin. Ev nêzîkatî û helwest ji bo sebotekirina pêvajoyê ne. Divê her kes li hember vê hişyar be û li dijî wê derkeve.
Pêvajoya Aştî û Civaka Demokratîk wekî pêvajoyek dîrokî hate destpêkirin. Lê belê, hişmendiya şovenîst, nijadperest û zordar ku ji destpêkê ve mayînde maye, bûye sedema pêşketinên xeternak. Li şûna piştgiriya aştî û xwişk-biratiyê, çapemeniya Tirk zimanek bikar aniye ku şer û dijminatiyê teşwîq dike. Partiya IP û nûnerên wê bi medyaya sereke re hevkariyê dikin da ku pêvajoyê bi dawî bikin. Ev rewş welêt ber bi rêgezek xeternak ve dibe. Di demekê de ku çarenûsa gelên Rojhilata Navîn ji nû ve tê nivîsandin, ev hişmendiya ku dijminê gelê xwe ye, hewl dide ku ji şer sûd werbigire. Êrîşên li ser Rêber Apo, ku gel û jin wî wekî pêşengê aştiyê dibînin, welêt ber bi karesatê ve dibe.
DIVÊ EM TÊKOŞÎNA JI BO AZADIYA FÎZÎKÎ YA RÊBER APO MEZIN BIKIN
Em hişyariyê didin. Eger ji bo pêşvebirina xwişk-biratî û aştiya hezar salî ya Kurd-Tirkan samîmiyetek hebe, wê demê divê ev zimanê çapemeniya rantxur a şerxwaz û qirêj, ev zimanê siyasetê di çarçoveya sûcê sorkirina şer de bê dîtin û darizandin. Eger dewlet bi rastî jî ji dil e, eger wê xizmetê ji aştiyê re bike, wê xurt bike, wê civakî bike hingî divê gavên erênî biavêje. Aştiyeke demokratîk û bi rûmet mafê gelên Kurd û Tirk e, mafê jin, ciwan û zarokan e. Weke tevger bi pêşengiya sermuzakerevanê xwe Rêber Apo me samîmiyeta xwe ya di vê mijarê de nîşan dan, em hîn jî nîşan didin. Lê belê em ê heqaret û provokasyonên bi vî rengî qebûl nekin û li hemberî wê jî heta dawiyê têbikoşin.
Di serî de jin em bang li hemû gelê xwe yê welatparêz, civaka demokratîk ya Tirkiyeyê û hemû alîgirên aşitiyê dikin ku li hemberî vê yekê helwesta xwe nîşan bidin û helwesta xwe ya demokratîk pêş bixin. Aşitiyeke Kurd-Tirkan a ku wê pêş bikeve, ji bo hemû gelên li Rojhilata Navîn û jinan pêngaveke dîrokî ye. Şerekî ku bi provokasyonên kesên weke Tûran Çomez dest pê bike jî wê bibe rûdana bi dehan Xezeyan, wê bibe şerekî wisa ku neteweya wan bi wan bide jibîrkirin û her wiha wê hemû kes zirarê jê bibîne. Ji ber vê yekê divê em heya dawiyê xwedî li Rêber Apo û xeta Aşitî û Civaka Demokratîk ya ji aliyê Rêber Apo ve hatiye pêşxistin, derkevin û ji bo ku weke sermuzakerevan rola xwe bilîze em têkoşîna ji bo azadiya fîzîkî ya Rêber Apo mezin bikin.’’
