Peyama Koordînasyona KJK’ê ku di mîtînga mezin a li bajarê Koln ê Elmanyayê hate xwendin de, daxwaza azadiya Rêberê Gelê Kurd Abdullah Ocalan û çareseriya demokratîk a pirsgirêka Kurd hate kirin û wiha hate gotin: “Jiyana azad a bi Rêberê Azad re ji her demê zêdetir nêzîk e!”
Peyama Koordînasyona KJK’ê wiha ye:
“Em çalakiya we û beşdarbûna we bi armanca pîroz , silav dikin û carek din dibêjin kes nikare roja me tarî bike, Ronahî Ji girava imraliyê li cîhanê belav dibe!
Li ser Komploya Navneteweyî ya 15’ê Sibatê kû li dijî Rêber Apo hat pêk anîn 25 sal derbas bû. Di salvegera komployê ku 25 sal li pey xwe hişt, em hêzên komploger şermezar dikin û careke din diyar dikin ku di salvegera 26. a komployê de em ê têkoşîn û berxwedana xwe ya azadiyê bilindtir bikin.
Em serîda hemû şehîdên xwe yên ku bi dirûşma ‘Hûn nikarin roja me tarî bikin’ li dora Rêber Apo bûn dîwarekî ji agir, bi rêzdarî bi bîr tînin.
Em çalakvanên greva birçîbûnê yên li zindanan, dayikên xwe yên di nobeda edaletê de ne û meşvanên azadiyê hemûyan silav dikin, berxwedana jinan, gelê me û dostên me pîroz dikin ku li dijî komployê ji Kurdistanê destpê kirin û li tevahiya cîhanê belav bû û 25 sal in berdewam dike.
Em dewletên ku tevlî komploya navneteweyî bûne careke din şermezar dikin û em diyar dikin ku wê li pêşberî gelan, li pêşberî dîrokê timî bêne darizandin û bi vî sûcê qirêj bêne bîranîn.
Hêza esasî ya ku komploya navneteweyî kir, sîstema modernîteya kapîtalîst a global bû. Armanca wan ew bû ku di şexsê Rêber Apo de tevgera azadiyê ya Kurd biqedînin, di serî de Kurdistan karibin destwerdanê li tevahiya Rojhilata Navîn bikin.
Ji bo cîhanê bi dest bixin, Rojhilata Navîn parve bikin di nava xwe de şerekî mezin ê berjewendiyan dimeşandin û gelê Kurd, gelên Rojhilata Navîn kirin qurbanê berjewendiyên xwe yên qirêj.
Li hemberî vê komploya qirêj ku roja qirkirinê ya Kurdan û jinan e, Rêber Apo çareseriya Modernîteya Demokratîk destnîşan kir ku ji bo gel û jinên Kurd bû rêya serkeftina têkoşîna hebûn û azadiyê. Serok Apo Destnîşan kir ku rêya esasî ya civakeke demokratîk jî xwe dispêre şoreşa azadiya jinê û şoreşa ekolojîk.
Bi afirandina hêzeke bi vî rengî ya çareseriyê, rastiya hêza modernîteya kapîtalîst ên ku komploya navneteweyî kirin ,nîşan da ku dijminê azadî, demokrasî, jin û gelan e û van hêzên ku xwestin wî û di şexsê wî de civaka demokratîk darizînin, wî bi xwe ew darizand û mehkûm kir.
Di nava sîstema qirkirinê ya Îmraliyê de ku ji bo wê digotin ‘Em ê hûcre bi hûcre bikujin, tune bikin’, Rêber Apo guhertina paradîgmayê pêk anî û bi gotina ‘Zayîna 3’yemîn’ pêk anî. Li cihê ku dihate gotin ku fikirîn lê nabe, Rêber Apo fikrên nû yên bûn hêviya cîhanê afirand û dengê jiyana azad a ku hêzên hegemon dixwestin bibirin, gihand tevahiya cîhanê. Ji ber vê yekê jî careke din divê bê destnîşankirin ku komploya navneteweyî bi berxwedana Rêber Apo û rêbaza wî ya têkoşînê li Îmraliyê hate pûçkirin.
Li hemberî komploya navneteweyî ku hate xwestin roja mirovahiyê bê tarîkirin, Rêber Apo kete nava têkoşîneke mezin, asta Rêbertiya Neteweyî gihand Rêbertiya global. Bû Rêberê bindestan, jinan, mirovahiyê û gelan. Rastiya Rêber Apo li hemberî hêzên komploger jin kir hêz û rêya rizgariyê.
Jin û gelan li dijî komploya 15’ê Sibat’ê her tim di nav têkoşînê de ne, azadiya Rêber APO dikin henceta jiyana xwe û wek vîna xwe diparêzin. Bi veguhertina hişmendî û pratîka çalakiya şoreşgerane beşdarî pêngava azadiya dîrokî ya Rêber APO dibin. Paradîgmaya Rêber APO û felsefeya JIN JIYAN AZADÎ belav dibe. Azadiya gelê Kurd bi çarenûsa gelên Rojhilata Navîn re dibe yek. Paşeroja demokratîk a gelên Rojhilata Navîn jî bi çareseriya Kurdistana demokratîk-xweser re pêkan dibe. Têkoşîna azadiya jinê, wek pergalek cîhanê ya nû di bingeha paradîgmaya demokratîk ekolojîk û azadîxwaziya jinê de, derfetên çareseriya konfederalîzma demokratîk diafrîne. Daxwaza pergalek nû ya civakî ya jin û gelan, têkoşînên civakî derdixe holê. Hêzên hegemon yê navnetewî ku van pêşketinan dibînin û netew-dewletên heremê yên statûkoperest û mêtingeh di stratejiya komploger de israr dikin. dijî vê sîstema ku jin bênasname kiriye, bêqîmet kiriye, kiriye mîna metayeke ku bê kirîn û firotin, ji nirxên wê dûr xistiye, li nava dîwarên malê asê kiriye, yan jî li nava sînorên dewletan asê kiriye!
Bi paradîgmaya demokratîk, ekolojîk û azadîparêziya jinê dîwarên vê jiyana dîlgirtî ya ku weke qederê li jinan dihate ferzkirin, parçe kir û îroj felsefeya Jin Jiyan Azadî bû pêşengiya serhildana Jinan û civakan!
Li dijî hêzên modernîteya kapîtalîst a ku ji bo pêşketin û berdewamiya xwe jinê weke milkê xwe ya herî girîng dibînin, paradigmaya azadiyê ya Rêber Apo bûye deriyê jiyana azad a ku jin pêl bi pêl ber bi wê ve diherikin. Pergala ku bi karekterên serdestiya mêr û jinên kole xwedî dibe, li hemberî paradigmaya me ya jiyana azad têk diçe. Ji ber vê jî di sedsala 21’an ku em weke sedsala jinê pênase dikin, em baştir dibînin ku komploya navnetewî di rastiyê de komployeke li dijî hemû jinên ku li jiyana azad digerin e. Ji bo vê jî divê jin bi hişmendiya ku komplo û tecrîda li dijî wan e, li dijî komployê û tecrîdê têkoşînê bilind bikin. Di ferqa ku azadiya Rêber Apo azadiya wan e, heta ku azadiya fîzîkî ya Rêber Apo pêk were, divê bi ruhê seferberiyê beşdarê tekoşînê bibin û rêxistina xwe xurt bikin.
Bi vê wesîleyê, em bang li tevahi gelê xwe, bi taybetî jin û ciwan, raya giştî ya demokratîk û dostên xwe dikin ku ji bo şikandina dîwarên esaretê ya Îmraliyê ku tê wateya qirkirina jin, xweza û mirovahiyê, li dijî komploya navneteweyî ji bo misogerkirina azadiya fîzîkî ya Rêber Apo bi rihê seferberiyê tekoşîna xwe asta herî bilind de pêk bînin! Bi Serokê azad re jiyana azad ji her demê nêztir e!”
