Konseya Rêveber a Kongera Neteweyî ya Kurdistanê (KNK) bi wesîleya Cejna Rmezanê daxuyanî da. Daxuyaniya KNK’ê bi vî rengî ye:
“Sibe cejn e, Cejna Remzanê ye. Em Cejna Remezanê, di sêrî de li girtî û şervanên azadiyê, li gelê Kurdistanê û li hemû alema Îslamê pîroz dikin. Em hêvî dikin ku Cejna Remezanê li welatê me û li hemû cîhanê, bibe wesîleya aştî û aramiyê.
Em niha di destpêka biharê de ne. Em di hefteya Newrozê de ne, me li seranserê Kurdistanê û derveyî welat, Cejna Newrozê bi coşekî mezin pîroz kir. Teybetî Newroza Rojhilat û Bakur weke serhildanekî hat pîrozkirin. Em bi coşa Newrozê Cejna Remezanê pêşwazî dikin.
Li Bakurê Kurdistanê ev demeke diyalogekî di navbera dewleta Tirk û Tevgera Azadiyê de heye. Lê heta niha, ji bilî daxuyaniyan, ti gav nehatine avêtin. Her wiha li Rojavaya Kurdistanê jî, di navbera Rêberiya Xweser û Rêveberiya Şamê de, protokolek hat îmzekirin. Em hêvî dikin ku diyaloga ku li Bakur û Rojava hatî destpêkirin, bigihêje encamekî pozîtîf û li van herdu parçeyan pirsgirêk bi rêya aştiyê bên çareserkirin.
Lê dîsa jî li welatê me rewşeke aloz jî heye. Li tevayî Kurdistanê dagirkerî, gef û tehdîtên dijminan li ser gelê me didomin. Li Rojhilat, zextên dewletê yên li ser gel berdewamin û pirsgirêkên civakî roj bi roj kûrtir dibin. Li Başûr jî pirsgirêkên aborî û civakî dewam dikin, pirsgirêkên herêmê heta niha jî nehatiye çareserkirin û êrîşên dewleta Tirk jî li ser vê zêde bûne. Divê hemû hêzên Kurdistanê dijî van gef û êrîşan derkevin. Bi wesîleya cejnê, em carekî din bang li hemû Kurd û Kurdistaniyan dikin ku li hember êrîş û dagirkeriyê derkevin, dengên nerazîbûna xwe ya li hember dagirkeran bilind bikin û yekîtiya xwe xurttir bikin.
Di van şert û mercan de jî be, em bi hêvî û xwedî wê baweriyê ne ku gelê me, dê di demeke nêz de bi aramî, aştî û azad, cejnên xwe û şahiyên xwe li ser axa xwe ya azad pîroz bikin. Bi vê munasebetê em careke dî Cejna Remezanê, li hemû girtî û şervanên azadiyê, li gelê Kurdistanê û li hemû alema Îslamê pîroz dikin.”
