Salah Bamîr (39) û Resûl Bamîr (48) ên ku li navçeya Şemzînanê ya Colemêrgê hatin binçavkirin û piştre hatin girtin. Hat diyarkirin ku di binçavan de bi êşkenceya giran re rê bi rê mane û îdîayên ku zêdetirî mehekê ji raya giştî hatine veşartin derketin holê.
Girtiyên li Girtîgeha Girtî ya Colemêrgê tên girtin piştî rewşa xwe ji parêzerên xwe re vegotin, ev îdîa ketin rojevê. Parêzerek di 10’ê Hezîranê de bi muwekîlên xwe re hevdîtin kir û tiştên ku bi serê kolberan hatine kirin agahdar bû. Piştî vê yekê parêzer xwest bi rêveberiya girtîgehê re hevdîtinê bike, daxwaza parêzer bê hincet hat redkirin. Her wiha hat hînbûn ku serlêdanên parêzeran jî hatine redkirin.
Piştî ku şaxên Komeleya Mafên Mirovan (ÎHD) û Komeleya Hiqûqnasên Ji Bo Azadiyê (OHD) yên Colemêrgê derbarê mijarê de hatin agahdarkirin, di encama hewldanan de parêzer di 22’yê Hezîranê de bi herdu kolberan re hevdîtin kirin. Di hevdîtinan de beyanên nivîskî ji herdu girtiyan hatin girtin.
ÊŞKENCEYA GIRAN Û DESTDIRÊJIYA ZAYENDÎ
Li gorî Ajansa Nûçeyan a Mezopotamyayê (MA), di beyanên ku parêzeran girtine de, Resul Bamîr diyar kiriye ku di binçavan de bi êrîşa zayendî re rû bi rû maye. Hat diyarkirin ku her du kolber di 15’ê Gulanê de hatine binçavkirin û sê rojan li Midûriyeta Polîsan a Şemzînanê bi êşkenceya giran re rû bi rû mane.
Herdu kolberên ku di 18’ê Gulanê de hatin girtin wan birin Girtîgeha Girtî ya Colemêrgê û hat ragihandin ku beriya wê li Serwîsa Lezgîn a Nexweşxaneya Dewletê ya Colemêrgê di konrola tenduristiyê de hatine derbaskirin. Lê di rapora yekem a tenduristiyê de cih nedan êrîşa zayendî ya Resûl Bamîr.
Kolberan di beyana xwe de diyarkirin ku tevî ku ew bi Tirkî nizanin jî di muayeneyê beyana wan negirtine û hat hînbûn ku di dema muayeneyê de wergervan ne li cem wan bûnî Li ser giliyê Resûl Bamîr a 20’ê Gulanê wî dîsa birin heman nexweşxaneyê û destdirêjiya li hemberî wî bi raporê hat piştrastkirin.
Koberan di beyanên nivîskî de diyar kirin ku nehatine muayenekirin.
Her wiha gardiyanên girtîgehê di beyanên dane parêzeran de, hat piştrastkirin ku bi şevê 2 kesên ku xwe wekî rayedarên îstîxbaratê dane nasîn di dîroka tê gotin de çûne girtîgehê, Resûl Bamîr û Salah Bamîr ji odeyên wan derxistine û wan birin cihê îşkenceyê. Derket holê ku dema gardiyanan rewş ji midûrê girtîgehê re vegotine, ji wan re gotiye, “Bêdeng bin têkilî wê nebin, em nikarin tiştekî bikin.”
Rapora Serwîsa Lezgîn a Nexweşxaneya Dewletê ya Colemêrgê a 18’ê Gulana 2026’an a ku MA’yê xwe guhandiyê, derket holê ku destdirêjî û êşkenceya ku Resûl Bamîr vegotiye di raporê de cih negirtiye. Lê di rapora 20’ê Gulanê ya heman nexweşxaneyê de cih dide destdirêjî û êşkenceyê.
Şaxên ÎHD û OHD yên Colemêrgê derbarê berpirsên êşkenceyê serlêdana sûc kirin.
