Serokwekîla Koma DEM Partiyê Gulîstan Kiliç Koçyîgît ku di dema hevdîtinên budçeyê yên li Meclîsê de ji derveyî mijarê mafê axaftinê girt, têkildarî gotinên li ser rapora partiya wê ya di çarçoveya Pêvajoya Aştî û Civaka Demokratîk de amadekiriye, axivî.
Gulîstan Kiliç Koçyîgît diyar kir ku tiştên ku li ser rapora DEM Partiyê têne gotin rastiyê nîşan nadin û wiha got, “Raporê fêm nekirine û ne bawerim xwendine jî. Niha bi berovajî kirinê hewl didin têgihiştineke cuda çêbikin. Rapora me ji awayê nivîskî ya tiştên ku me heta niha gotine, nexşerêya wê û ji peyv û hevokên li ser çareseriya demokratîk a pirsgirêka Kurd pêk tê. Em ji bo ku li vî welatî kes nemire, ciwan nemirin, aştî bibe, gelên Tirk û Kurd bi awayekî wekhev û azad bi hev re jiyan bikin dixebitin. Em ji bo vê siyasetê dikin, têdikoşin, lê em dibînin ku dijberên pêvajoyê ku dixwazin aştiya Kurd û Tirkan asteng bikin hene. Gelo kî li pişt van dijberên pêvajoyê hene? Li gorî me divê mirov bala xwe bide! Ez zelal bibêjim; eşkere ye ku li pişt van dijberên pêvajoyê nîvendên dewletê yên ne qanûnî hene. Eşkere û zelal e ku li herêmê rêxistinên îstîxbaratê yên hin hêzên navneteweyî hene. Zelal e ku kesên ku heftê 24 demjimêran dixebitin da ku rê li ber mafên Kurdan bigirin hene. Lê em vê bêjin; em ê van komên ku bi xwîn, hêstir û dijminatiya Kurdan hebûna xwe didomînin re xwe ranegirin. Li vî welatî, çi dibe bila bibe, em ê heftê 24 demjimêran ji bo wekhevî û azadiya gelan, çareseriya demokratîk a pirsgirêka Kurd û avakirina aştiyeke mezin ne tenê li Tirkiyeyê, lê di heman demê de li herêmê jî bixebitin; û em ê peyv û hevokên xwe ji bo vê armancê çêbikin. Kurd dê welatiyên wekhev û azad ên vî welatî bin” .
