Li Tirkiye û Kurdistanê ji bo kesên ku di demên cuda yên têkoşîna azadiya Kurd de şehîd bûne, bernameyên taziye û bîranînê didomin. Bîranîn û taziye bi pêşengiya Komeleya Yekitî, Çand, Piştevanî û Alîkariyê ya bi Malbatên ku di Dergûşa Şaristaniyê de Xizmên Xwe Winda Kirine re (MEBYA-DER) tên amadekirin.
Li Stenbolê bîranîn û taziyeya ku di 22’yê Tebaxê de dest pê kirin, li navçeyan berdewam dikin. Bi hezaran welatî beşdarî taziye û bîranînan dibin û ji malbatên şehîdên têkoşîna azadiyê re sersaxiyê dixwazin.
Hevserokê MEBYA-DER’ê Îlhamî Kûrt têkildarê taziyeyên ku li Stenbolê hatine danîn û berteka gel, ji ajansa me re axivî.
‘LI NAVÇEYAN TAZIYEYÊN ME DEWAM DIKIN’
Kûrt da zanîn ku li Stenbolê taziye di 22’yê Tebaxê de dest pê kirine û piştre li ser daxwaza malbatan li her herêmê taziye hatine danîn û axaftina xwe wiha domand: “Pêşî serê hemû gelê Kurd û dostên me sax be. Di 22’yê Tebaxê de li Sancaktepeyê ji bo 19 hevrêyên me taziye û bîranîn hat organizekirin. Di heman rojê de, li Bagcilarê jî bîranîna 22 hevrêyan hat lidarxistin. Piştî bîranînan malbatan daxwazên xwe yên taziyeyê gihandin me. Em jî li her herêmê di nav xwe de, li navçeyan taziyeyan datînin. Li hindek cihan çar kes, li hindek cihan du kes. Bi wî rengî niha li hemû navçeyên me taziyeyên me berdewam dikin.”
‘EM ALÎKARIYA MALBATÊN XWE DIKIN’
Kûrt anî ziman ku piştî ragihandina şehîdên dawî û danîna taziyeyan, bi taybetî malbatên gerîlayên ku di salên 90’î de şehîd bûne ji ber mercên wê demê nikaribûn taziye deynin, niha daxwaza danîna taziyeyê dikin û got: “Taziye wê berdewam bikin. Malbatên ku di salên 1993 û 94’an de û di demên ku şert û merc zehf giran bûn de taziyeya xwe nedaniyan, daxwazeke wan a bi vî rengî heye. Malbat dixwazin taziyeya xwe deynin. Em jî bi pêşengiya MEBYA-DER’ê alîkariya malbatan dikin û taziye têne danîn. Ev taziye wê berdewam bikin jî.”
‘MALBATÊN KU NIKARIBÛN TAZIYE DEYNIN SERÎ LI ME DIDIN’
Kûrt diyar kir ku di demên herî giran ên şer de gelek malbatan nikaribûn taziye deynin û di malên xwe de bi rengekî veşartî şehîdên xwe bi bîr dianîn. Kûrt, da xuyakirin ku piştî taziyeyên girseyî yên li Kurdistan û Stenbolê, malbat dibînin ku gelê Kurd xwedî li şehîdên xwe derdikeve, lewma serî li wan didin û wiha pêde çû: “Gelek malbatên me di salên 2000, 2014 û 90’î de ji ber giraniya şert û mercan taziyeyên xwe tenê li malên xwe dikirin. Di odeyekê de ku kes nebihîze û kes nebîne. Ji ber şert û mercên wê demê taziya xwe di nav malê de datanîn. Lê belê bi vê pêvajoya dawî re û bi destpêkirina vê pêvajoya aştiyê re, malbat êdî taziyeyek bi beşdariya gel û wêne lê hatine daliqandin, dixwazin. Em jî bi pêşengiya MEBYA-DER’ê van taziyeyan organîze dikin. Di nav malbatan de cesaret û hêzek çêbûye; em niha taziyeya wan hevrêyên ku wê demê taziya wan nehatibû danîn, ji nû ve datînin.”
‘MALBAT DIBÊJIN BILA AŞTÎ PÊK BÊ Û ZAROKÊN ME BIBIN ŞEHÎDÊN DAWÎ’
Kûrt da zanîn ku dema diçûn cem malbatan ji bo agahdarkirina şehîdan, tirsa wan a herî mezin berteka malbatan bû, lê belê malbatan bi sekneke birêz ev rewş pêşwazî kirine û piştgirî dane pêvajoyê. Kûrt, di dawiyê de ev tişt gotin: “Bi rastî me difikirî ku di vê pêvajoyê de saziyeke ku herî zêde zorê bibîne wê MEBYA-DER be. Yanî me fikar dikir ku ‘Gelo em ê çawa biçin cem malbatan? Wê berteka malbatan çawa be?’. Lê piştî destpêkirina van taziyeyan, bi taybetî dayikên me gotin ‘Bila ev şer raweste, bila zarokên me bibin şehîdên dawî’. Ji ber ku malbat bi vê nêzîkatiyê piştgiriya aştiyê dikin, hemû dayik û malbat her dem di taziyeyê de cîh digirin û hêzê didin me. Bi rastî dayik me teselî dikin. Sekna bihêz û cesareta dayikan, hêj bêtir me bi vê karî ve girêdan.”
