Bi wesîleya 8’ê Adarê Roja Jinên Kedkar ên Cîhanê li navçeya Curnê Reş a Rihayê, Tevgera Jinên Azad (TJA) şahiyek lidar xist. Şahî li Parka Kurd pêk hat û gelek jin tevlî bûn. Bi zimanên Kurdî û Tirkî pankarta bi nivîsa “Raperîna me li dijî qirkirina jinê ye, meşa me ber bi azadiyê ve ye” li gel alên kesk, sor, zer û mor hatin daliqandin. Jin bi pûşiyên ji rengê kesk, sor û zer û kincên neteweyî ketin qada şahiyê. Di şahiyê de govend hate gerandin û dirûşma ‘Jin, Jiyan, Azadî’ hate qîrîn.
Hevseroka Rêxistina Rihayê ya DEM Partiyê Sema Aîşeoglû jin silav kir û 8’ê Adarê pîroz kir.
Piştre Hevşaredarê Curnê Reş Garîp Yeşîl axivî û anî ziman ku Curnê Reş di nava têkoşîna azadiyê ya jinên Kurd de xwedî cihekî girîng e û berdêlên giran dane.
Berdevka Meclîsa Dayikên Aştiyê Havva Kiran jî diyar kir ku divê dayik bi taybetî bersivê bidin banga dîrokî ya Rêber Apo û got, “Em ne tenê gelê Kurd, hemû gelên mezlûm silav dikin. Em ji vê derê ji bo jinên Fîlîstînî jî banga aştiyê dikin. Em êşa dayikên Tirk jî parve dikin. Em bang li dayikên leşker û polîsan dikin. Bila dakevin qadan û dest ji bikaranîna zimanê tund berdin. Werin em dest bidin hev û ji bo aştiyê bibin yek. Dayikên Kurd êşên gelekî mezin kişandin. Canekî me heye bila ew jî fedaî aştiyê be.”
Parlamentera Rihayê ya DEM Partiyê Dîlan Kûnt Ayan jî bi bîr xist ku jinên Curnê Reş pêşengî ji vê têkoşînê re kirin.
Piştî axaftinan hunermend Baran Bozyel derkete ser dikê û beşdaran li ber stranên wî govend gerandin.
