Komîteya Çandê ya Meclisa Bajarê Eyn Îsayê ya kantona Firatê, bi diruşma “Bi Aştî û Civaka Demokratîk Em ê Mîratiya xwe Biparêzin û Sûriyeyek Nenavendî Ava Bikin” 6’emîn Festîvala Girê Spî ya Çand û Hunerê li dar xist.
Festîval li nêzî kampa koçberên Girê Spî, bi beşdariya sedan xelê bajarên Girê Spî û Eyn Îsayê û gundewarên wê, kesayetên ji eşîrên kantonên Firat û Reqayê, hat organîzekirin.
Beşdarên festîvalê diyarkirin ku ew li benda vegereke bi ewle ne û di wê baweriyê de ne ku festîvala bê li Girê Spî pîroz bikin.
Hevseroka Meclisa Bajarê Eyn îsayê Ezîze El Hesen axaftina destpêkê kir, bi xêrhatina beşdaran kir û wiha got: “Em li vir bi rengê xwe çanda xwe derdixin pêş, ew çanda ku ji pêşiyên me ji me re maye em jî ji nifşên pêşiya xwe re dihêlin. Niha em li vir li ber xwe didin, ew berxwedanî bi rihê xwişk-biratiya gelan e. Armanca vî gelî vegera li Girê Sipî ye. Di festîvalê de rihê demokratîkbûnê heye, rihê Kurd, Ereb, Aşûr û Sûryanan heye.”
Dûre jî Hevserokê Kar û Barên Civakî a Kantona Firatê Ehmed Xoce axivî û anî ziman ku di nav hevpeymana 10’ê Adarê de vegera koçberan heye, divê vegereke bi ewle ji bo tevahî koçberan çêbibe û wiha got, “Çavê her kesî êdî li vegerê ye, dixwazin vegerin ser cih û warên xwe. Em di wê hêviyê de ne ku em sala bê li wir festîvala xwe li dar bixin.”
Piştre wê jî kalemêrê bi navê Mihemed Mamo Reşo got ku ew bi van festîvalan re çanda her netewê diparêzin û vedugeherînin ji nifşên din re û anî ziman ku ew niha çanda her netewê didin jiyîn û wiha got, “Ev dihêle ku em parastina hemû çanda netewan bikin. Bi riya van festîvalan em çanda xwe diparêzin. Lê xwesteka me ew e ku em li ser axa xwe yê Girê Sipî pîroz bikin.
Piştî axaftinan komên ji netewên cuda derketin ser dikê û stranan gotin.
Festîval bi xelatkirina komên beşdaran û dayîna spasnameyan û teqeziya berdewamkirina destpêşxerêyên çandî ku mîrat û kûrahiya nirxên jiyana hevbeş diparêzin, bi dawî bû.
