Erdal Ozel ê ku li gel nexweşiyên şîzofrenî û demansê nexweşiyên wî yên weke dilî, tansiyona zêde, diyabet, gurçik û prostatê jî hene, nikare ji astengiya ATK’yê ‘’dikare li girtîgehê bimîne’’ derbas bibe û ew 19 sal in tê rehîngirtin.
Ozel ê ku di sala 2006’an de bi hincetên weke ‘’endamtiya rêxistinê’’ û têkbirina aramî û yekîtiya dewletê’’ cezayê muebetê lê hatiye birîn, destpêkê 6 mehan li Girtîgeha Bayrampaşayê tê rehîngirtin û piştre jî ji Girtîgeha Girtî yaTîpa F a Tekîrdagê re hate sirgûnkirin. Erdal Ozel nêzîkî du salan beriya niha jî ji Girtîgeha Tîpa R a Metrîsê re hatiye sewqkirin.
Xwişka wî Kumrî Akgul ji ANF’ê re axivî û bi bîr xist ku birayê wî dema di sala 2005’an de hate binçavkirin êşkence lê hatiye kirin. Kumrî Akgul ev yek anîn ziman: ‘’70 sal ceza li Erdal hate birîn. Di sala 2010’an de dubare derxistin dadgehê. Wê demê nexweş bû û ji ber nexweşiya xwe dixeriqî. Ji bilî êşkenceya di bin çavan de dema ji Girtîgeha Tekîrdagê re hate sirgûnkirin di rê de gelek êşkence lê dihate kirin.
BI ÎDÎAYA XWEKUŞTINÊ VEDIŞÊRIN
Di sala 2011’an de ji Tekîrdagê li me geriyan û îdîa kirin ku birayê min hewl daye xwe bikuje û gotin ku ew rakirine Nexweşxaneya Derûnî ya Bakirkoyê. Em çûn serdana wî lê belê Erdal em nas nekirin. Li ser rûyê wî gelek şopên derbeyan hebûn. Li ser gelek cihên laşê wî cixare hatibû temirandin. Diyar bû ku ji aliyê gardiyanan ve êşkence lê hatibû kirin. Li wir ji me re gotin ku birayê min hewl daye bedena xwe bide ber agir lê belê min bawer nekir. Ji ber ku li ser gelek cihên laşê wî şopên êşkenceyê hebûn.’’
DEMA HAT SER HIŞÊ XWE RASTÎ ANÎN ZIMAN
Kumrî Akgul diyar kir ku wê demê teşhîsa şîzofreniya giran lê hatibû dayîn û nêzîkî du salan li Nexweşxaneya Bakirkoyê hate girtin û ew yek anîn ziman: ‘’Destpêkê wî em nas nedikirin. Ne li ser hişê xwe jî bû. Piştre hêdî hêdî em nas kirin. Dema hate ser hişê xwe me jê re pirsî bê ka çima ev yek kiriye, got; ‘Min xwe neşewitand, min tişteke bi vî rengî nekir. Bi êşkenceyê wiha li min hat.’ Piştre ATK’ê biryara ku dikare li girtîgehê di odeya yekkesî de bimîne, da. Nabin nexweşxaneye baş. Nayên tedawîkirin.
DUBARE ANÎN METRÎSÊ
Ev nêzîkî du salan e dubare anîne Metrîsê. Sala borî jî xwînariya mîdeyê derbas kir. Ji ber ku diyabeta wî heye, nikare xwarinê bixwe û dermaên wî bandorê li mîdeya wî dikin. Ji bo xwînariya mîdeyê wî dibin nexweşxaneyê lê belê dubare dibin Metrîsê û vê carê jîkrîza dil derbas dike. Tevî ku dibêje ez nikarim li ser piyan jî bisekinim û anjiyo li min hatiye kirin jî 8 saetan li ser piyan digirin.’’
NABIN KONTROLÊ
Kumrî Akgul diyar kir ku herî dawiyê di cejnê de çûye seredana wî û got ku piştî anjiyo û endoskopiyê wî nabin kontrolê û ev yek anîn ziman: ‘’Birayê min ji min re got ku ‘tedawiya me asteng dikin.’ Her wiha ji cihê Erdal lê dimîne re ava pîs dilop dike. Bavêmin bi rêveberiya girtîgehê re axivîlê belê gotin ku ‘ji ber ku hucreya yekkesî tune ye em Erdal li wê derê digirin.’ Tevî ku Girtîgeha Tîpa T a Revîrê heye jî girtiyeke nexweş di nava van şert û mercan de digirin. Me disala 2020’an de bi dirûşmeya ‘Em naxwazin zarokên me bimirin’ 11 mehan li pêşiya Edliyeya Çaglayanê nobeda edaletê girt. Gelek caran êşkence li me hate kirin û em hatin binçavkirin. Ji bo azadiya zarokên me em ê daxwazên xwe tim bînin ziman.’’
