Malpera Kolbernews’ê têkildarî berdewambûna zext û gefên li ser mamostayên Kurd ên li Rojhilatê Kurdistanê de agahî belav kirin.
Hate diyarkirin ku li bajarên Seqîz û Sine yên Rojhilatê Kurdistanê cezayê bi ser 5 mamostayên Kurd ên bi navê Mecîd Kerîmî, Xeyas Nîmetî, Nesrîn Kerîmî, Feysel Nûrî û Şehram Kerîmî hatî sepandin, ji aliyê liqa 31 ya Buroya Dadweriya Îdarî ya Wezareta Perwerdeyê ya Îranê ve hatiye pejirandin.
Her wiha hate ragihandin ku derxistina Selah Hecî Mîrzayî hatiye betalkirin û doza wî ji bo ji nû ve darizandinê ji Lijneya Nirxandina Binpêkirinên Îdarî ya wezaretê re hatiye şandin.
Kolbernews da zanîn ku mamostayên hatine cezakirin endamên Encumena Yekîtiya Mamostayên Kurdin û bi dûrxistina ji pîşeyên wan û teqawidbûna bi mecbûrî hatine cezakirin.
Gorî agahiyan Şehram Kerîmî bi şeş meh cezayê ji kar dûrxistinê, Mecîd Kerîmî û Xeyas Nîmetî bi cezayê ji kar derxistina daîmî, Nesrîn Kerîmî teqawidbûna bi neçarî, Feysel Nûrî bi 5 sal dûrxistina li parêzgeha Kirmanşanê û Selah Hacî Mîrzayî bi salekê derxistina demkî hatine cezakirin.
Hêjayî gotinêye ku roja 21’ê Tebaxê Meclisa Mamostayên Sineyê ragihand ku di çarçoveya çewisandinên dijî mamostayên Kurd, 14 mamostayên li bajarên Sine, Seqîz û Dîwandere, ji aliyê Lijneya Nirxandina Binpêkirinên Îdarî ya Wezareta Perwerdeyê ya Îranê ve bi cezayên wek ‘xanenişînbûna bi zorê, durxistina ji kar’ hatin cezakirin.
Li gorî di daxuyaniyê de hatiye belavkirin navê mamostayên hatine cezakirin wihane: “Mecîd Kerîmî, Xeyas Nîmetî, Selah Hacî Mîrzayî, Nesrîn Kerîmî, Leyla Zarî, Feysel Nûrî, Perweyz Hesenî, Kawe Mihemed Zade, Hîwa Qureyşî, Umêd Şamhemedî, Şehram Kerîmî, Luqman Ela Muradî, Suleyman Ebdî, Mehyedîn Reyhanî.”
