Li navçeya Samandag a Hatayê ku rojên dawî bi êrîş û provokasyonên li hemberî karkerên Kurd dikeve rojevê, di nava du rojan de 8 ciwan bûn hedefa êrîşa polîsan û gelê herêmê. Êrîşa destpêkê bi bahaneya cezayê trafîkê ya li wesayitên çar ciwanan hate kirin. Piştî rojekê bi hinceta ku bi Kurdî diaxivin, xwestin ciwanên li peravê rûniştî lînç bikin.
Yek ji mexdûrên êrîşan Mûhammed Bayram anî ziman ku ji ber wan nerazîbûn nîşanî polîsan dan ku cezayê trafîkê birî, destpêkê polîsan piştre jî gel li wan xistin, heqaret li wan kirin û bi gotina ‘Em Kurdan li vê derê naxwazin, ji vir biçin’ gef li wan hate xwarin.
Mûhammed Bayram diyar kir ku ewlekariya jiyana wan nîne, lewma serê sibehê saet di 4’an de bi rê ketin û got, li gel ku wan tiştek nekirin jî polîsan giliyê wan kirin û li ser vê yekê biraziyê wî hate girtin.
Bûyer li navçeya Samandag a Hatayê li peravê qewimî. Çar ciwanên Amedî yên ji bo karkirina li înşaeta TOKÎ çûbû bajêr, li vê derê piştî ku demekê rûniştin, polîsan ceza li wesayitên wan birîn, wan jî nerazîbûn nîşan dan. Mûhammed Bayram anî ziman ku piştre polîsên sivîl hatin cihê bûyerê, nerazîbûn nîşanî wan dan û piştî ku gel tevlî bûyerê bû polîsan gotin, “Ji vir biçin, naxwe wê we bikujin.”
Bayram ragihand ku ji bo wergirtina telefon û alavên xwe piştî demekê vegeriyan cihê bûyerê û careke din bi gotina ‘Dîsa hûn, em we li vir naxwazin, ji vir biçin’ heqaret li wan hatiye kirin. Bayram diyar kir ku di demeke kurt de hem polîsan hem jî gelê li wir li wan xistin. Bayram anî ziman ku polîsan gaza îsotê berda çavên wan, ew bi erdê re kaş kirin û got, “Me destê xwe neda kesî. Wan li me xistin, li gel vê yekê jî giliyê me kirin.”
Bayram bi dewamî got, “Ji me re gotin, ‘Hûn ji Amedê ne, Kurd in, em we li vir naxwazin. Em li dij in ku hûn li vir bixebitin’. Telefonên me li ser maseyê ma bûn. Polîsan em dûr xistin û gotin, ‘Hûn eger li vir bimînin wê we bikujin’. Me xwest rahêjin malzemeyên xwe, lê belê destûr nedan.”
