Li taxên Şêxmeqsûd û Eşrefiyê yên Helebê ku nifûsa Kurdan lê zêde ye, hîn jî rû bi rûyê êrîşên hêzên hikûmeta demkî ya Sûriyeyê dimînin. Tevî Peymana 1’ê Nîsanê jî tengasî di rojên dawî de car din zêde bûn.
Li gorî çavkaniyên herêmî, duh di saetên şevê de bi topan êrîşî taxan hate kirin û bi tankan hate dorpêçkirin. Hêzên Ewlekariya Hundirîn diyar kir ku êrîş ji aliyê komên Wezareta Parastinê ya Hikûmeta Demkî ve hatin destpêkirin û ragihand ku 2 roketên RPG li çeperên wan ketine. Di êrîşên topan de ti windahiyên can çênebûn, lê zirara madî çêbû.
Rojnamevan Mihemed Ebdo ku geşedanên li herêmê ji nêz ve dişopîne, diyar kir ku taxên Şêxmeqsûd û Eşrefiyê ji duh ve di bin êrîşan de ye. Ebdo anî ziman ku li derdora taxan tank, top û çekên giran hatine bicihkirin û got, “Çekên ku li milê Zîrea, Çerxerêya Şihan, taxa Hilok, rêya Ewarid û Eşrefiyê hatine bicihkirin, hîn jî li cihê xwe ne. Ev rewş gefê li sivîlan dixwe.”
Ebdo ragihand ku ji duh heya îro zêdeyî 6 top li taxên Şêxmeqsûd û Eşrefiyê hatine xistin, di êrîşan de windahiyên can çênebûn lê zirara madî çêbû. Ebdo diyar kir ku her wiha careke din rêyên Şêxmeqsûd, Eşrefiyê û taxên din ên Helebê bi temamî hatine girtin, tenê ji bo derketina ji taxan destûr heye û got, peydakirina pêdiviyên esas ên gel, tê astengkirin.
Ebdo destnîşan kir ku li taxan pirsgirêka elektrîkê û qutbûna avê heye, pêdiviyeke lezgîn bi sotemenî, kel û pelên tenduristiyê û pêwistiyên esas heye û hişyarî da ku eger rewşa heyî bidome, dibe krîzeke mirovî ya cidî çêbibe. Ebdo ev nirxandin kir: “Dixwazin gel ji van taxan koçber bibe. Gel li vir bi berxwedana xwe komployên dewleta Tirk û hikûmeta demkî vale derxist. Lewma her cure zor, zehmetî û zextê li ser gel dikin da ku gel ji van taxan derxîne.”
Rojnamevan destnîşan kir ku komên çeteyên ên ku êrîşan pêk tînin, komên mîna Hemzat, Emşat, Esiftil-Şemal (Bahoza Bakur) û Nureddîn Zenkî ne ku berê di dema dagirkirina Efrînê de hatibûn bicihkirin û navên xwe guhertin û wiha got, “Hemû çeteyên dewleta Tirk in ên ku navê xwe guhertine. Bi navê firqeya 60’an, firqeya 72’yan, firqeya 76’an û firqeya 80’an di bin bunyeya Wezareta Parastinê ya Hikûmeta Demkî de êrîşî Şêxmeqsûd û Eşrefiyê dikin. Ev hemû fermanên xwe ji îstîxbarata dewleta Tirk digirin.”
Ebdo ev tişt bilêv kir: “Êrîşên hatine kirin, encama planekê ye. Her du tax ev 4 meh in din dorpêçê de ne. Jixwe li ser her du taxan SÎHA û dronên bombebarkirî digeriyan. Piştî vê liv û tevgerê, êrîş destpê kirin.” Ebdo destnîşan kir ku bi van êrîşan Peymana 10’ê Adarê û Peymana 1’ê Nîsanê tê binpêkirin û bi bîr xist ku êrîş 22’yê Kanûnê piştî serdana Wezîrê Karên Derve yê Tirk Hakan Fîdan a ji bo Şamê, destpê kirin.
