Hikûmeta demkî ya Sûriyeyê bêyî ku îradeya gelê bajarokê Çelebiyê yê Kobanê esas bigire, şaredarek tayîn kir. Şêniyên bajêr yên ku li dijî vê biryarê derketin berê xwe dan ber Şaredariya Çelebiyê. Li ber Şaredariya Çelebiyê çeteyên HTŞ’ê êrîşê gel kirin û dor li wan girtin. Her wiha destûr nedan rojnamevan bûyerê bişopînin û êrîşê rojnamevanan jî kirin. Di dîmenên dawî de jî çeteyan raste rast êrîşî sivîlan dikirin û li wan didan.
Ji bo êrîşa li ser şêniyên bajarokê Çelebiyê, Rêveberiya Xweser a bajarê Kobanê daxuyanî da.
Daxuyaniya Rêveberiya Xweser a bajarê Kobanê bi vî rengî ye, “Li gorî peymana ku di 29’ê Çileyê de di navbera Hêzên Sûriyeya Demokratîk û hikûmeta demkî ya Sûriyeyê de hat îmzekirin, divê entegrasyon bihata kirin û îradeya gelê herêmê bihata naskirin. Her wiha rêveberiyên saziyan ji nava gelê herêmê bihata wezîfedarkirin. Li ser vê bingehê, parêzgarê Hesekê û hejmarek ji rêvebirên din ji nav xelkê parêzgehê hatin tayînkirin. Lê belê, ev pêvajo li herêma Kobanê nehat cîbicîkirin, ku rêveberên saziyên herêmî ji derve têne tayînkirin. Heta niha, rêveberek ji bo herêmê û rêveberên navçeyên Sirîn û Çelebiyê bêyî ku van biryaran bi xelkê Kobanê re nîqaş bikin, hatine tayînkirin.
Ev gavên ku ji aliyê rêveberiya Parêzgeha Helebê ve hatine avêtin, ne li gorî naveroka peymana 29’ê Çileyê ne û rêveberiya Parêzgehê pabendî şertên peymana entegrasyonê ya ku ji aliyê hikûmeta veguhêz a Şamê bi Hêzên Sûriyeya Demokratîk re hatiye çêkirin nîne. Ev kiryarên ku ji aliyê rêveberiya Parêzgehê ve hatine avêtin, pêkanîna entegrasyonê asteng dikin.
Piştî ku rêveberiya Parêzgeha Helebê rêveber ji bo saziyên navçeya Çelebiyê tayîn kirin, xelkê Kobanê û navçeya Çelebiyê li navçeyê kom bûn da ku helwesta xwe raber bikin. Lê Hêzên Ewlekariya Hundirîn û hêzên leşkerî yên girêdayî Hikûmeta Demkî bi awayekî tund destwerdan kirin û nehiştin ku xelk daxuyaniyê bide, êrîşî xelkê kirin û hewldan ku hinekan ji wan bigirin.
Em, wekî rêveberiya xweser û gelê Kobanê, van kiryaran şermezar dikin û bang li hikûmeta veguhêz dikin ku pabendî şertên peymana 29’ê Çileyê bibe û pêvajoya entegrasyonê li gorî wê bicîh bîne. Em tekez dikin ku em ê ji bilî vê tiştekî din qebûl nekin.”
