Dewleta Tirk bi êrîşên xwe yên li ser Rojava û hedefgirtina binesaziya stratejîk ên herêmê re, armanc dike ku şert û mercên jiyanê zortir bike û gel ji xaka Kurdistanê bide koçber kirin. Di çarçoveya van êrîşan de bendava Tişrînê ya ku ji bo enerjiyê ciheke krîtîk e jî hedef tê girtin. Ji destpêka şerê navxweyî yê li Sûriyeyê û vir ve komên cîhadîst ên radîkal ên ji aliyê Tirkiyeyê ve tên destekkirin, bi taybetî li dijî Kurdan tên bikaranîn.
Aktîvîsta Kongreya Îslama Demokratîk Hatîce Kavran, anî ziman ku rola pêşengiya jinê ya di şoreşa Rojava de ne tenê di aliyê leşkerî de, di heman demê de veguhertineke civakî û îdelojîk jî çêkiriye. Hatîce Kavran, destnîşan kir ku ji ber tehemûla komên cîhadîst û Tirkiye li hemberî têkoşîn û biryardariya aktîf a jinan a li eniyê nîne, bê navber êrîş dikin û got, “Ev kom, parçeyek ji avahiyên çeteyan ên ji qetilkirina Hevrîn Xelef û bi sedan jinên Kurd berpirsyar in. Her wiha beşdarkirina pêkhateyên bi vî rengî di nava dezgehên siyasî de ku wê siberoja Sûriyeyê diyar bikin, xeteriyeke mezin ava dikin.”
ŞOREŞA JIN TÊ HEDEFGIRTIN
Hatîce Kavran, da xuyakirin ku şoreşa bi pêşengiya jinê ya li Rojava, ji aliyê hêzên herêmî ve weke gefekê tê dîtin û ji bo bêîstîkrarkirina herêmê zexteke bi zanebûn hatiye pêşxistin. Hatîce Kavran, destnîşan kir ku êrîşên li hemberî sivîlan, hedefgirtina jinan bi awayekî sîstematîk û hewldana tepisandina berxwedana li Rojava, ji bo teşe dayîna Rojava û siberoja Sûriyeyê parçeyek stratejîk e.
Hatîce Kavran, da zanîn ku barê hemû şerên li cîhanê li ser milê jinan e û got, “Jin ti carî nebûne alîgiriya şer. Lê belê her tim bûne qurbanên şer. Li Sûriyeyê ji ber şerê navxweyî jinan berdêlên giran dan.”
JI BO KURD NEBIN XWEDÎ STATÛ ÊRÎŞ TÊ KIRIN
Hatîce Kavran, diyar kir ku armanca dewleta Tirk ew e ku Kurd nebin xwedî statû û got ku ji bo vê dewleta Tirk bi mîlyonan dolar çek ji bo çeteyan şandin. Kavran, destnîşan kir ku li dijî êrîşan bi taybetî jinên berxwedêr di serî de li Girê Miştenûr li her derê têkoşiyan, heta kêliya xwe ya dawî şer kirin û çeteyan têk birin. Kavran, anî ziman ku dewleta Tirk a ku vê têkçûnê nepejirand, raste rast bi artêşa xwe û balafirên şer êrîşê Rojava dike û wiha domand, “Armanca ew e ku Rojava ya ku di tevahiya dîrokê de bûye dilê berxwedanê yê Kurdan tine bike û Kurdan bênefes bihêle. Di vî şerê qirêj de herî zêde jinên Kurd êş kişandin. Bi rûyê herî hov ê şer re rû bi rû man. Jinên Kurd hedef hatin girtin, hatin revandin, li bazarên koleyan hatin firotin, rastî destavêtinê hatin, bi hovane hatin kuştin. Hê jî aqûbeta bi hezaran kesî nayê zanîn. Ev hemû di bin navê Îslamê hatin kirin. Ev çeteyên ku ji xwe re digotin ‘mucahîd’ di rastiyê de dijminên herî mezin ên ol in.
TEVÎ BÊDERFETIYAN JÎ KURDAN ŞER KIR
Kavran, da xuyakirin ku berxwedana jinên Kurd ji tevahiya cîhanê re bûye çavkaniya îlhamê û wiha dom kir, “Ew tevî tirs, êş û xiyanetê jî serê xwe bilind kirin û berxwedan hilbijartin. Li dijî barbarên ku ji deverên cuda ên cîhanê ji bo pereyan berhev kirine, ji bo azadiyê şer kirin. Gelên Kurd, Ereb, Ermenî, Asûrî, Tirkmen, Misilman, Xiristiyan, Êzidî, Sûnî, Elewî yên ji hemû etnîsîte û baweriyên cuda yên li Rojava dijîn, karîn bi hev re rêveberiyeke demokratîk û rêxistinbûyîna civakî ava bikin. Cudahiyên xwe yên etnîkî û olî danîn aliyekî û xakên ku bi hev re dijiyan parastin. Li welatekî ku artêş hilweşiya û serokê dewletê reviya, li dijî du dewlet û çeteyên hov şer kirine û tevî hemû bêderfetiyan jî hê şer dikin.”
