Yekîtiya Ciwanên Êzidî û Yekîtiya Jinên Ciwan ên Şengalê ji bo pîrozkirina peyama Rêber Apo bi tevlîbûna xelkê Şengalê li Baxçê Serokatî kombûn. Li Baxçê serokatî navê Rêber Apo bi agir hate nivîsîn, posterên Rêber Apo hate rakirin û pankarta, ‘Tav a Êzidxanê, Rêber Apo ye’ daliqandin.
Piştî deqîqeyek rêzgirtin ji bo hemû şehîdên Şengalê û Kurdistanê, Berdevka Yekîtiya Ciwanên Êzidî Sara Botan axivî û peyama, ‘Rêber Apo çi bêje, em pêre ne’ da.
Sara Botan bi silavkirina berxwedana Rêber Apo ya li Îmraliyê dest bi axaftina xwe kir û got: “Em berxwedana Îmraliyê silav dikin. Me coş û heyecaneke mezin ji Rêber Apo girt. 26 sale, li Îmraliyê dibin tecrîdeke giran de tê girtin. Berxwedaneke mezin ji bo azadiya fizîkî ya Rêber Apo li Kurdistan, herêm û cîhanê hate dayîn ku Şengal jî di navê de ye. Ev berxwedan hişt ku dewleta Tirk gav bi paşve biavêje û hevdîtin bi Rêber Apo re were kirin. Peyama Rêber Apo ji bo me hemûyan cihê moral û kêfxweşiyê ye. Rêber Apo 50 sale, dixwaze pirsgirêka Kurd-Tirk bi rêya diyalogê çareser bike. Rêber Apo ne di vê peyama dawiyê de, pêncî sale ji bo vêya têdikoşe.”
Sara Botan, di dewama axaftina xwede bal kişand ser bandora fikrê Rêber Apo ya li ser civaka Êzidî û axaftina xwe wiha domand: “Ev 11 sale em jî xwe li ser fikrê Rêber Apo ya ‘Netewa Demokratîk’ rêxistin dikin. Saziyên me jî li ser vî fikrî avabûn. Em ji saya fikrê Rêber Apo bûn xwedî îrade. Ji dîrokê ve heya niha em jî weke civaka Êzidî rûberûyê êrîşên Osmaniyan tên. Dewleta Tirk timî bi êrîşan bersiva diyalogê dide. Heya niha bi gelek pêşengên me yên Êzidî jî şehîd xistiye.”
Tevî êrîş û zirerên ku ji destê dewleta Tirk dîtine jî Sara Botan piştgiriya ciwanên Êzidî ya ji bo peyama Rêber Apo ragihand û got: “Em dibêjin, weke civaka Êzidî bi peyama Rêber Apo re ne. Rêber Apo di nava tevgera xwe de herî zêde rol û erk dide ser milê jin û ciwanan. Em jî dibêjin, em ê pêşengiyê ji pêkanîna peyama Rêber Apo re bikin û em ê hewl bidin pêşengiyeke rast bikin.
Em bi peyama Rêber Apo re ketine serdemeke nû. Bi banga Rêber Apo re divê em berxwedanî û têkoşîna xwe hîn xurttir bikin. Divê em gavên hîn xurttir biavêjin. Pêwîste em peyama Rêber Apo şaş fêm nekin, rast fêm bikin. Li gorî wê jî divê em rêxistinbûna xwe mezintir bikin. Ji bo vêya em dibêjin, heya azadiya fizîkî ya Rêber Apo pêk neyê wê berxwedana me bidome.’
Sara Botan da zanîn tenê peyama Rêber Apo girtin têrê nake, divê azadiya wî ya fizîkî pêk were û bi vê peyamê axaftina xwe bi dawî kir: “Nabe em bi girtina agahî û peyama Rêber Apo re têkoşîna xwe sist bikin, ev têrker nîne. Divê heya azadiya Rêber Apo, em tu carî ne rûnin. Me peyam ji Rêber Apo girt, lê wê sala 2025’an bibe sala azadiya fizîkî ya Rêber Apo, ev jî wê bi berxwedanî û têkoşîna me pêk were. Em careke din dibêjin, em bi peyama Rêber Apo re ne, ‘Bijî Rêber Apo.”
Piştî axaftina Sara Botan Însiyatîfa Ciwanên Ereb yên Şengalê jî peyama piştgiriyê û silavkirina Rêber Apo dan.
Piştî berzkirina dirûşmeya, ‘Bijî Serok Apo’ ciwanan li ber stanan govend geranandin.
