Semîner ji aliyê Tevgera Azadiya Jinên Êzidî (TAJÊ) ve hate lidarxistin. Semîner li Şaredariya Gel a Serdeştê, ji aliyê endama Akademiya Jineolojiyê Delîla Medya ve hat dayîn.
Berî destpêkirina semînerê, di şexsê şehîdên 14’ê Tîrmehê de, hemû şehîdên şoreşê bi rêzdarî hatin bîranîn. Piştî bîranîna şehîdan, nameya Rêber Apo ku ji Akademiya Jineolojiyê re şandibû, hat xwendin.
PÊWÎSTE JIN JI HER ALÎ VE JI XWE BAWER BIN
Delîla Medya di axaftina xwe de bal kişand ser mîsyon û girîngiya Jineolojiyê. Wê diyar kir ku jin pêşengiya banga Aştî û Civaka Demokratîk dikin û got: “Divê destpêkê li her cihê ku em lê ne, rastiya Serokatî bînin ziman û bidin famkirin. Bendewariya Rêber Apo ji bo jinan pir zêde ye. Weke Şengal, em çawa bikarin pêşengiyê ji jinên cîhanê re bikin, em ê li ser vê bisekinin. Pêwîst e jin ji her alî ve ji xwe bawer be. Ji bo azadiya xwe û azadiya civakê têbikoşin. Divê hemû jin hêz û têkoşîna xwe bikin yek.”
‘DIVÊ EM DI JINEOLOJIYÊ DE KÛR BIBIN’
Jinên beşdar jî nêrînên xwe yên li ser mijarê anîn ziman û gotin, “Destpêkê em Rêber Apo silav dikin û bi dîtina wî gelek kêfxweş bûn. Tiştekî gelek girîng e ku em niha jin di semînera Jineolojiyê de tên gel hev. Beriya her kesî, heta beriya jin, Rêber Apo jin fikiriye û ji bo azadiya wê têkoşiya ye û têdikoşe. Rêber Apo dixwaze jin azad bibin û azad bijîn. Divê em jin jî xwe ji her alî ve perwerde bikin da ku bikarin erk û mîsyona pêşengiya xwe bi cih bînin. Em dixwazin xwe di felsefeya Jineolojiyê de kûr bikin û di jiyana xwe de bidin rûniştandin.”
Semîner bi dirûşmên ‘Jin, Jiyan, Azadî û ‘Bijî Serok Apo’ bi dawî bû.
