Piştî vekişandina hêzên leşkerî ji her du taxan di çarçoveya hevpeymana ku di navbera Meclisa Giştî ya Eşrefiye û Şêxmeqsûdê û Rêveberiya Demî ya Şamê de hate îmzekirin, hêzên asayîşê erka ewlehiyê girt ser xwe.
Li gorî benda 6’an a peymana ku di 1 ‘ê Nîsanê de hate îmzekirin, hêzên leşkerî yên her du taxan ber bi rojhilatê Firatê ve vekişiyan û bi vê yekê erka parastina ewlehiya taxan ji hêzên Asayîşê re hiştin.
Yekîneyên Parastina Gel (YPG) duh ragihand ku ew ê li gorî peymanê tevbigerin û dê erka pêkanîna ewlehiya li taxan ji Hêzên Ewlekariya Hundirîn re bihêlin.
Piştî derketina hêzên leşkerî Hêzên Ewlekariya Hundirîn berpirsyariya ewlehiyê girt ser xwe.
Yek ji rêveberên Hêzên Ewlekariya Hundirîn a Şêxmeqsûd û Eşrefiyê Arîn Ebdo ji Ajansa Nûçeyan a Hawarê (ANHA) re axivî û diyar kir ku li gorî hatiye plankirin ewlehî li taxan pêk hatiye û destnîşan kir ku wek Hêzên Ewlekariya Hundirîn tecrubeya wan a 10 salan heye ku ewlehiyê pêk bînin. Arîn Ebdo got ku ew ê ji bo ewlehiya gel hemû tedbîrên xwe bigirin.
