Li gorî Navenda Çavdêriya Mafên Mirovan a Sûriyeyê (SOHR) li taxa Someriyê ya Şamê ku piraniya niştecihên wê Elewî ne, rageşî derketiye. SOHR’ê diyar kir ku alozî piştî bang li şêniyan hate kirin ku di nava 24 saetan de malên xwe vala bikin, derket.
Şêniyên taxê diyar kir ku berpirsekî hêzên ewlehiyê bi navê Ebû Huzeya hatiye taxê û agahî daye ku malên bi rengê kesk hatine nîşankirin, di planê de ne û dê di çend saetên pêş de werin rûxandin. Ev yek şênî xistin nava tirs û fikaran.
Şêniyan da zanîn ku ev yek di çarçoveya zextên plankirî de têne kirin da ku şêniyan neçar bikin biçin. Her wiha diyar kir ku dixwazin bi vê yekê demografiya taxên Elewiyan biguherînin.
SOHR’ê da zanîn ku komên çekdar ên girêdayî hikumeta veguhêz a Sûriyeyê bi kontrolkirina wan û qedexekirina tevgerên wan zextê li ser şêniyan zêdetir dikin.
Di dema dawîn de dîwarekî îzolekirina li derdora taxê bi temamî danîn. Di encamê de tevgera çûn û hatinê ya şêniyan asteng dikin.
Şêniyan ev nêzîkatî wek hewldana koçberkirinê bi nav kir.
