Fermandarê Giştî yê Hêzên Sûriya Demokratîk (QSD) Mazlûm Ebdî têkildarî êrîşên li dijî Elewiyan, diyar kir ku bang li Serokê Heyet Tehrîr El Şam (HTŞ) Ebû Muhammed Colanî (Ehmed Şara) kir ku hesab ji berpirsyarên êrîşan bipirse. Mazlûm Ebdî bi daxuyaniyeke nivîskî ji Reutersê re axivî û destnîşan kir ku diviyabû Colanî mudaxeleyî komkujiyan bikira.
Ebdî diyar kir ku komên alîgirê DAIŞ’ê û çekdar ên ku Tirkiye piştgiriya wan dike berpirsyarê herî sereke yê êrîşan e. Ebdî bang li Colanî kir ku “rêbaza avakirina artêşa Sûriyê ya nû û reftarên komên çekdar di ber çavan re derbas bike”. Ebdî anî ziman ku hin komên hewl didin di nava artêşê de ”nakokiyên mezhebî û navxweyî” derxin.
TIRKIYE BERSIV NEDA REUTERSÊ
Wezareta Parastinê ya Tirkiyeyê derbarê gotinên Ebdî de nirxandin nekir û Wezareta Karên Derve jî bersiva neda daxwaza Reutersê.
