Koma xebata hevpar a hunermendên TEV ÇAND û Akademiya Sînemayê ya Rojhilata Navîn ragihand ku belgefîlma “Rojiya Jiyanê” a ku li ser Berxwedana Rojiya Mirinê ya Mezin a 14’ê Tîrmehê hatiye amadekirin qediyaye. Prodoksiyon û amadekarî ji hêla Art Recordsê ve hat kirin. Ev xebata helbestî ya ku dîtbarî û gotinê di nav hev de hunandiye wê di 12’ê Tîrmehê de were weşandin.
Hunermendên TEV ÇAND û koma xebatê ya Komeleya Akademiya Sînemayê ya Rojhilata Navîn ku demeke li amedê xebata kolektîf dimeşînin bi daxuyaniyek nivîskî ragihandin ku qonaxên kişandin û montajkirina belgefîlma “Rojiya Jiyanê” qediyaye. Berhema ku li ser berxwedana rojiya mirinê ya dîrokî ya 14’ê Tîrmeha 1982’an a li dijî polîtîkayên hovane yên li Zindana Leşkerî ya Hejmar 5 a Diyarbekirê hatiye amadekirin, xebatên wê ji hêla Art Records ve hat meşandin. Xebata ku her kes bi sebreke mezin li bendê ne wê sibê were weşandin.
‘RÊZGIRTINA JI BO BERXWEDÊRÊN ZINDANÊ’
Di daxuyaniya ku li ser navê koma xebatê hat dayin de bal kişand ser armanca xebatê û bîra dîrokî.
Di daxuyaniyê de ev tişt hatin parvekirin: “Em deyndarê wan in! Bi vê berhemê re em bi rêzdarî qehremanên wê berxwedana bêhempa û karwanê azadiyê yê ku di rêya bi rûmet a ku wan vekiriye de meşiyane bi bîr tînin. Ev xebat rêzgirtina ji bo berxwedêrên zindanê ye.”
ŞAHIDIYA BÊDENG A KOGUŞA 35’AN
Art Records a ku hilberandin û teknîka fîlm meşand xwest ku temaşevan bi bîranîn û rastiya zindanê re rû bi rû bên. Fîlm çîroka şoreşgerekî berê ku piştî salan ji zindanê derketiye û piştî salan vedigere Zindana Amed û keleha berxwedanê ya dîrokî “Koguşa 35’an”.
Serdana bêdeng a girtiyê berê bêyî ku hewcedariya wî bi diyalogê bibîne, atmosfera êşkence û hovîtiya wê demê û îradeya mezin a ku li dijî wê hatiye pêşxistin bi sînematografiyê radixe ber çavan.
‘TEVKARIYA AVAKIRINA CIVAKA AZAD’
Koma xebatê bal kişand ser ola hilberîna hunerî ya di avakirina civakî û wiha bi dawî kir: “Di vê serdema girîng de, em armanc dikin ku bi vê hilberêîna hunerî tevkariya avakirina civaka azad û demokratîk bikin. Em zîndîkirina mîrata berxwedana pêşengên vê têkoşîna bi rûmet û bîra kolektîf a civakê wekî peywireke dîrokî dibînin.”
Hunera Azad – Rojiya Jiyanê
Tekst: Hekîm Sefkan
Muzîk û Producer: Mazlûm R.
Xwendin: Gulistan Çiya Îke & Hekîm Sefkan
Derhêner: Metîn Ewr
Amadekar: Art Records
