Meclisa Giştî ya Taxên Şêxmeqsûd û Eşrefiyê daxuyaniyek têkildarî sûcên li Efrînê ji aliyê dewleta Tirk û çeteyên wê ve têne kirin, da.
Daxuyanî li Çerxerêya Zeytûn a li taxa Eşrefiyê bi amadebûna şêniyên her du taxan, koçberên Efrînê, nûnerên partiyên siyasî û saziyên sivîl hat xwendin.
Cîgira hevserokên Meclisa Gişt ya Taxên Şêxmeqsûd û Eşrefiyê Dunya Bekir bi zimanê kurdî û rêveberê meclisê Mistefa Mihemed bi zimanê erebî daxuyanî xwend. Girse wêneyên Şukrî Ehmed Oso (65), Mihemed Ehmed Derwîş (55) û Mistefa Mihemed Îso ên di encamên siyasetên plankirî yên dagirker û çeteyan de jiyana xwe ji dest dane, hildan.
Di destpêka daxuyaniyê de hat gotin, Efrîna kevnar ku bi zeytûnên xwe tê naskirin û di dirêjahiya salên şer ji tevahî gelê Sûriyeyê re bibû stargeh, di nava rêze binpêkirin û sûcên domdar de dinale.
Hate diyarkirin ku li Efrînê darên zeytûnan ku jêdera debara şêniyan e û hafîzeya civakî û nasnameya axê ye, bi awayekî sîstematîk tên talankirin, di encamê de êşên rojane yên cotkaran zêdetir dibin.
Di dewama daxuyaniyê de îşaret bi vê yekê hat kirin ku îsal talankirina zeytûnan bi rêbazên nû têne kirin û wiha hate gotin: “Komîteya qaşo aborî bi hinceta ku belgeyên wan temam nebûne, dest datîne ser zeviyên cotkaran. Êş bi talankirina zeviyan sînordar nemaye, lê mîrasteya şaristanî û şûnwarên Efrînê bi awayekî sîstematîk hatin wêrankirin û demgorafiya herêmê jî hatiye guhertin. Destdirêjiya li şûnaran tenê wêrankirina kevirên bêdeng nin e, lê belê îmhakirina rihê dîrokê ye û reşkirina dîroka wê ya kevinar e ku gelê wê pê serbilind e.”
Di daxuyaniyê de sûcên kuştinê hatin şermezarkirin û hate diyarkirin “Sivîl dibin qurbanên guleyên xedar an jî binpêkirinan. Di encamê de jiyana xwe ji dest didin. Ev hemû binpêkirina mafên mirovan û rûmeta jiyanê ne.”
Di daxuyaniyê de hate zanîn ku “Tevî kontrola hikumeta veguhêz ku divê şêniyan biparêze û qanûnê ferz bike, lê tirs bûye hevrê şêniyan û der dora hermû sûcan de nezelalî hene.”
Meclisê di daxuyaniyê de diyar kir ku hikumeta veguhêz a Sûriyeyê, civaka navneteweyî û rêxistinên mafên mirovan berpirsên sûc û binpêkirinên ku Efrînê têne kirine. Her wiha destnîşan kir ku armanc ji sûc û binpêkirinan tunekirina şêniyên resen, koçberkirina wan û pêkanîna guhertina demgorafiyê ye.
Di dawiya daxuyaniyê de banga parastina sivîlan û milkên wan û hesabpirsîna ji sûcdaran hat kirin. Bang li hikumeta veguhêz jî hat kirin ku sozên xwe li hember şêniyên Efrînê bi cih bînin.
