Şaredariyên DEM Partiyê yên navçeyên Rihayê (Wêranşar, Pirsûs, Hewag, Serêkaniyê, Curnê Reş) bi dirûşma “Ji bo jiyaneke bêtundî û azad, û gotina me xilas nebû, em ê bi hev re tundiyê rawestînin” dest bi çalakiyên xwe yên 25’ê Mijdarê kirin.
Di civîna çapemeniyê ya li Şaredariya Curnê Reş de, hevşaredar û rêveberên partiyê beşdar bûn. Bêrîvan Îlîgen, Endama Koordînasyona Navenda Piştevaniya Jinê ya DEM Partiyê, destnîşan kir ku pergala siyasî û civakî ya ku jinê tune dihesibîne, tundiyê rewa dike û mafê nunertiyê desteser dike, bi komkujiyên jinan rûyê xwe yê herî hov nîşan dide.
Bêrîvan Îlîgen got ku tundiya li dijî mafê jiyanê yê jinan, êrişeke siyasî, pergalî û mêtinger e. Diyar kir ku çareserî bi têgîn û rêbazên sîstema baviksalarî nayê kirin, lê çareserî bi rêya avakirina jiyana komunal bi meclîsên jin, ciwan û gel re, zindîkirina nirxên sincî-siyasî û jêbuhurîna hişmendiya mêr a hezarsalî gengaz e.
Di vê çarçoveyê de, ji sala 1999’an û vir ve ji bo xurtkirina polîtîkayên jinan di rêveberiyên herêmî de têkoşîn tê meşandin û pergala hevserokatiyê hatiye bicîhkirin. Ev pergal li gorî paradîgmaya demokratîk, ekolojîk û azadîxwaziya jinê vîna jinê dike kirdeya siyasetê.
Tevî zirarên polîtîkayên qeyûman, şaredariyên DEM Partiyê bi biryar in ku li her derê bibin vîna çareseriyê. Di vê çarçoveyê de wan:
Meclîsên Jinan ji nû ve ava kirin, komîsyonên Wekheviya Jinan damezrandin û navendên Jiyanê yên Jinan, Yekîneyên Perwerde û Polîtîkayê yên Jinan, Navendên Piştevaniya Jinan ên ku hatibûn girtin, ji nû ve vekirin.
Berdevkê destnîşan kir ku qeyranên ku ji aliyê pergalên mêtinger, otorîter û mîlîtarîst ve kûrtir dibin, bi berzbûna têkoşîna jinan wê bên buhurîn. Pêşeroj, wê li ser felsefeya Jin, Jiyan, Azadî, azadî û wekheviya jinê were avakirin.
Piştî daxuyaniyê, jinan di nav çarşiya Curnê Reş de bi dirûşma “Jin, jiyan, azadî” meşiyan.
SEMSÛR
Tevgera Jinên Azad (TJA), li navçeya Bulam a Semsûrê starta çalakiyên 25’ê Mijdarê Roja Têkoşîna Li Dijî Tundiya Li Ser Jinan a Navneteweyî da. Parlamentera Partiya Wekhevî û Demokrasiyê ya Gelan (DEM Partî) a Amedê Ceylan Akça Cupolo tevlî bernameyê bû. Çalakî dê di bin dirûşma “Bi civaka demokratîk ve ber bi jiyana azad a bê tundî ve” bên li darxistin.
Aktîvîstên TJA’yê serdana karkerên titûnê yê Bûlamê kir û pirsgirêkên jinan guhdar kirin.
Ceylan Akça Cupolo, di axaftina xwe de bal kişand ser îfşakirina zîhniyeta serdest a mêr û diyar kir hevgirtina jinan di vê helê de gelek girîng e.
DÎLOK
Tevgera Jinên Azad (TJA) di çarçoveya 25’ê Mijdarê Roja Têkoşîna li Dijî Tundiya li Ser Jinan a Navneteweyî de, atolyeyên xwe didomîne. Yek ji atolyeyên ku bi dirûşma ‘Bi Civaka Demokratîk Ber Bi Jiyana Azad a Bê Tundî”, li navçeya Şehitkamil a Dîlokê hate lidarxistin. Gelek jin beşdarî atolyeya ku li avahiya navçeyê ya Partiya Wekhevî û Demokrasiyê ya Gelan ( DEM Partî) hate lidarxistin, bûn.
Di atolyeyê de pêşî wate û girîngiya 25’ê Mijdarê, digel çarçoveya wê ya dîrokî, hate destnîşankirin. Piştî vê yekê, nîqaş li ser cureyên tundûtûjiya li dijî jinan û çawaniya têkoşîna li dijî wê hatin kirin.
Jinên ku beşdarî atolyeyê bûn, mînakên tundiyê ku ew di jiyana xwe ya rojane de bi wan re rûbirû dimînin, dan û bal kişandin ser pêwîstiya têkoşîna li dijî tundiyê. Jinan destnîşan kirin ku xebata Rêberê Gelê Kurd Abdullah Ocalan ji bo azadiya jinan cesaret û hêz daye wan û wiha lê zêde kirin. “Em bi perspektîfa Rêber Apo hatin vê astê. Em ji tundiyê haydar in û em li dijî wê têkoşînê didin.”
STENBOL
Li Stenbolê, jin di pêşengiya Platforma 25’ê Mijdarê de, li ber Postexaneya Kadikoyê bi dirûşma “Em hevgirtinê xurt dikin û nameyan ji jinên girtî re dişînin” kom bûn. Di çalakiya ku bi boneya 25’ê Mijdarê, Roja Têkoşîna li Dijî Tundiya li Ser Jinan a Navneteweyî hat lidarxistin de, jinan pankartên bi nivîsên “Jiyana me û têkoşîna me ne sûc e”, “Jinên ku xwedî li jiyana xwe derdikevin ne bi tenê ne”, “Azadî ji bo girtiyên siyasî” û “Di 25’ê Mijdarê de li dijî şîdeta dewleta mêr derkevin kolanan” hilgirtin. Jinan gelek caran dirûşmên wekî “Girtiyên siyasî rûmeta me ne”, “Bila tundiya dewleta mêr bi dawî bibe” û “Hevgirtina jinan dîwaran derbas dike” berz kirin.
Endama Platforma Jinan a 25’ê Mijdarê Eda Kalafan, li vir axivî û bal kişand ser binpêkirinên ku li girtîgehan diqewimin û got: “Li girtîgehan, jin bi polîtîkayên wekî lêgerîna tazî, biryarên lijneyê û cezayên dîsîplînê têne tecrîdkirin. Jin ji ber ku dixwazin bijîn ji hêla pergala serdest a mêr ve têne cezakirin. Jinên ku dixwazin ji bo daxwaza azadî û wekheviyê derkevin kolanan, li her deverê bi tundiyê re rû bi rû dimînin. Em ê heta 25’ê Mijdarê li her derê, li her qadê bin.” Piştî daxuyaniyê, jin derbasî postexaneyê bûn û ji jinên girtî re kart şandin.
BEDLÎS
Tevgera Jinên Azad (TJA) di çarçoveya 25’ê Mijdarê Roja Têkoşîna li Dijî Tundiya li Ser Jinan a Navneteweyî de, li pêşiya Rêxistina Partiya Wekhevî û Demokrasiyê ya Gelan a (DEM Partî) ya li navçeya Tetwan a Bedlîsê daxuyanî da. Li gel nûnerên partiyên siyasî û saziyên demokratîk, gelek kes beşdarî daxuyanî bûn.
Endama TJA’yê Nurdan Îlbasan di daxuyaniyê de axivî û wiha got, “Em îro jî 25’ê Mijdarê bi hêrs û berxwedana jinên hatine qetilkirin, pêşwazî dikin. Em li dijî qirkirina jinê têkoşîna xwe mezin dikin. Em vê 25’ê Mijdarê jî li aliyekî bi hêrsa jinan, li aliyekî jjî bi hêviya avakirina aştiyê pêşwazî dikin. Rêya ku em bimeşin û têkoşîna ku em bidin heye! Em bang li hemû jinan dikin ku ber bi azadiyê ve bimeşin, gotinê mezin bikin û destkeftiyan jinan jiyanî bikin. Bijî têkoşîna jinan a birêxistinkirî.”
Daxuyanî bi dirûşmeya “Jin, Jiyan, Azadî” bi dawî bû.
