Li Wargeha Penaberan a Şehîd Rûstem Cûdî (Mexmûr) jî di bin pêşengtiya Meclisa Îştar de jinan bi daxuyaniyekê birayara darvekirinê ya rejîma Îranê ya li ser Şerîfe Mihemedî, Pexşan Ezîzî û Werîşe Mûradî şermezar kirin. Daxuyanî li ber avahiya Meclisa Îştar bi deqeyek rêzgirtinê destpê kir. Piştî rêzgirtinê daxuyanî ji aliyê Endama Meclisa Îştar Xurbet Îşlek ve hat xwendin.
Di daxuyaniyê de hate destnîşankirin ku di şerên berjewendiyê yên li Rojhilata Navîn de bedelê herî giran jin didin û wiha hate gotin: “Di Rojhilata Navîn de şereke berjewendiyê yê mezin tê meşandin û wek tê zanîn armanca vî şerî tunekirina gelane. Ji vî şerî jî yê herî zêde di aliyê nerênî de bandor dibin, yên tên qetilkirin, destdirêjî û bê mafiyê re rûbirû dimînin jin û zarokin. Armanca wan hêzên xwînmij tunekirina nasnameya jina azade. Ji ber ku ji jina azad ditirsin, dizanin ku ger jin azad bibe wê civak jî azad bibe.
Weke tê zanîn rejîma ku li hember nasnameya jina Kurd disekine, rejîma Îranê ye. Her tim dixwaze nasnemeya jina azad desteser bike, darvekin û qetilkirinê li ser ferz bike. Bi hişmendiya mêrsalarî tevdigere. Darvekirina Werîşe Mûradî, Pexşan Ezîzî û Şerîfe Mihemedî, darvekirina jina azad û meşrûkirina wê ye.”
Di berdewamiya daxuyaniyê de wiha hate gotin: “Em weke jinên Wargeha Şehîd Rûstem Cûdî (Mexmûr) ne tenê rejîma Îranê, hemû dewletên qaşo dibêjin em mafên jinan diparêzin, xwedî li nasnameya jinan derdikevin, lê di esas de her roj bi dehan jin di bin navê namûs, hezkirin, xwekuştinê de qetil dikin, şermezar dikin. Li rûxmê ku dewleta Tirk digot wê sala 2025’an bibe sala malbat û jinê, lê belê rastiya ku li ber çave bûye sala qirkirina jinê. Têkoşîna me wê heta dawî ji bo nasname û îradeya jina azad berdewam bike û em ê her tim berxwedana xwe bilind bikin.
Em bang li hemû rayedarên giştî yên dewletê, kesên demokrat, rêxistinên mafên jina diparêzin dikin ku li rol û erkê xwe xwedî derbikevin û demildest pêşî li qetilkirina jinan bigirin.”
Daxuyanî bi dirûşmeyên ‘Bijî Serok Apo’, ‘ Jin Jiyan Azadî’ bi dawî bû.
