Di meha Îlonê de jî êrişên çeteyên DAIŞ’ê yên li ser Bakur û Rohilatê Sûriyeyê dewam kir.
1’yê Îlonê çeteyên DAIŞ’ê êrişî gundewarên bakurê kantona Reqayê kir. Şervanên QSD’ê bersiva êrişan da û şer derket. Di necamê de 2 çete hatin kuştin û 3 şervanên QSD’ê birîndar bûn.
2’yê Îlonê Hêzên Ewlekariya Hundirîn hewldana revandina nêzî 30 malbatên DAIŞ’ê ji kampa Holê têk bir.
15’ê Îlonê, şaneyên çeteyên DAIŞ’ê êrişî bajarokê Behra yê li rojhilatê kantona Dêrazorê kir. Şervanên QSD’ê bersiva êrişan da û şer derket. Di encamê de 5 şervanên QSD’ê şehîd bûn, şervanek birîndar bû.
19’ê Îlonê şervanên QSD’ê bersiva êrişa şaneyên çeteyên DAIŞ’ê ya li ser bajarokê Mihêmîdiya yê kantona Dêrazorê da. Şervanek şehîd bû û 2 jî birîndar bûn.
22’yê Îlonê şervanên QSD’ê bersiva êrişa şaneyên DAIŞ’ê ya li ser gundewarên rojhilatê Helebê da. Di dema bersivdayînê de şervanê QSD’ê Omer El Mûsa şehîd bû.
25’ê Îlonê şaneyên çeteyên DAIŞ’ê li Behraya Navîn êrişî nuqteya QSD’ê kir. Şervanên QSD’ê bersiva êrişê da û şer derket. Di encamê de 5 şervan şehîd bûn û yek birîndar bû.
26’ê Îlonê şaneyên çeteyên DAIŞ’ê li ser rêya di navbera kantona Dêrazorê û kantona Cizîrê de êrişî tankereke petrolê kir. Di encamê de zirarên madî çêbûn.
27’ê Îlonê şaneyên çeteyên DAIŞ’ê êrişî bajarokê Îbrîha yê li rojhilatê kantona Dêrazorê kir. Şervanên QSD’ê bersiv da û şer derket. 4 şervan şehîd bûn û çeteyek hat kuştin.
28’ê Îlonê çeteyan êriş bire ser derdora bajarokê Bisêra yê kantona Dêrazorê. Şervanan êriş têk bir, 4 şervan şehîd bûn.
Di heman rojê de Hêzên Ewlekariya Hundirîn li gundewarên kantona Dêrazorê 2 DAIŞ’î girtin ku hewl dida êrişî erebeya endamên hêzên wan bikin.
30’ê Îlonê şervanên Meclisa Leşkerî ya Hecînê êrişa çeteyên DAIŞ’ê ya li ser bajarokê Derenc ê li rojhilatê Dêrazorê têk bir. Di şer de serçeteyekî şaneyên DAIŞ’ê birîndar bû û ji aliyê şervanan ve hat girtin. Her wiha şervanekî meclisê şehîd bû û yekî din birîndar bû. Di berbanga heman rojê de şaneyên DAIŞ’ê êrişî tankereke petrolê kir û ajokarê wê birîndar kir.
Di encama êrişên meha Îlonê de, 21 şervanên QSD’ê şehîd bûn, 9 şervan û sivîlek birîndar bûn. 3 çeteyên şaneyên DAIŞ’ê hatin kuştin û yek jê serçete, 11 çeteyên din hatin girtin.
Bi vê yekê re hejmara êrişên şaneyên çeteyên DAIŞ’ê yên ji destpêka îsal ve li dijî Bakur û Rojhilatê Sûriyeyê dibe 184. Piraniya wan li kantona Dêrazorê hatine kirin. QSD û Hêzên Ewlekariya Hundirîn jî ji destpêka îsal ve li dijî şaneyên DAIŞ’ê jî 70 operasyon pêk anîne.
Şaneyên DAIŞ’ê di Tebaxê de 25 êriş li ser herêmên Bakur û Rojhilatê Sûriyeyê kirin. Di encama êrişan de 13 şervan û sivîl şehîd bûn û 11 şervan birîndar bûn. Li hemberî van êrişan QSD û Hêzên Ewlekariya Hundirîn 7 operasyon pêk anîn. Di encama van operasyonan de 3 çete hatin kuştin, yek jê serçete, 47 çete hatin girtin.
