Di daxuyaniya Fermandariya Giştî ya Yekîneyên Parastina Jin (YPJ) de ev tişt hatin diyarkirin:
“Şoreşa Azadiyê ji bo parastina nirxên civakî dilên wêrek afirand. Ji bo bi destxistina jiyaneke wekhev têkoşîneke bêhampa tê dayîn. Di nava refên azadiyê de şervanên YPJ’ê bi destanên xwe yên lehengiyê pîvanên rast ên jiyaneke bi rûmet şênber dikin.
Hevrêya me Şêrîn Fetah bi nasnav Gerîla Qamişlo li bajarê Hesekê di nava malbateke welatparêz de ji dayik dibe. Şoreşa azadiyê nifşeke xwedî lêgerîn û îdealên bilind yên jiyana azad afirand, ji ber wê jî jin û ciwan di nava refên şoreşê de bi ked û fedakariyeke mezin têkoşîn dikin. Hevala me Gerîla di sala 2021’an de bi biryardariyeke bilind berê xwe dide nava refên YPJ’ê. Girêdanbûn û heskirina ji Rêber Apo re di tevlîbûna hevrê Gerîla de risteke diyarker dilîze. Di temeneke ciwan de têgeha wext da aliyekî û di demeke pir kurt de hem di warê leşkerî hem jî warê bîrdozî de xwe pêş xist. Her kêliya jiyana xwe weke milîtaneke Apoyî bi sekna xwe ye dilnizm û fedakar jiya. Hevrê Gerîla di nava hevrêyên xwe de bi coş û kelecana xwe ye ji jiyanê re dihate nasîn. Weke milîtaneke jin di stratejiya şer de xwe kur û weke sekvaneke jin bi rol û mîsyoneke girîng rabû. Bi ruheke berpirsiyar ji bo parastina destkeftiyên şoreşê herdem çalak bû.
Hevrêya me Gerîla Qamişlo dema li ser erka xwe bû, di dîroka 20’ê Adara 2024’an de li Til Rifat di encama qezayekê de şehîd bû.
Em di serî de ji bo malbata hevrê Gerîla û tevahî gelê xwe yê welatparêz sersaxiyê dixwazin. Em weke YPJ her tim li pey doza şehîdên xwe ne, em soza bilindkirin û geşkirina têkoşîna azadiyê nû dikin.“
Nasnameya şehîd bi vî rengî ye:
Nav û Paşnav: Şêrîn Fetah
Nasnav: Gerîla Qamişlo
Navê Dayîk: Macîde
Navê Bav: Elî
Cih û Dîroka Şehadetê: 20.03.2024, Til Rifat.
