Berdevka Meclîsa Jinan a dema beriya niya ya HDP’ê û hiqûqnas Ayşe Acar Başaran tespîtên Rêber Apo yên di salvegera Banga Aştî û Civaka Demokratîk de kir, nirxand. Ayşe Acar Başaran bi bîr xist ku Rêber Apo jin weke “Parçeyê herî azadîxwaz ê entegrasyona demokratîk û hêza dehfdanê” pênase kir û destnîşan kir ku ev pênase ji aliyê siyasî û dîrokî ve diyarker e.
Başaran diyar kir ku ne tenê daxuyaniya dawî, Rêber Apo di hemû nirxandinên xwe de destpêka dîrokî ya têkiliyên serweriyê dispêre kolekirin jinê û got, “Têkiliya bindest-serdestan, desthilatdarî û xerabûna civakî di şexsê jinê de destpê kir. Gelek tecrûbeyên şoreşgerî ji ber ku jin bi têrkerî nekirin navend, nekarîn modeleke civakî ya azadîparêz û mayinde biafirînin. Di pêvajoyên şoreşê de jin li refên herî pêş in; lê belê di pêvajoya jinûve avakirinê de tê gotin, ‘Hûn êdî vegerin malê’. Ocalan berevajî vê yekê dibêje.”
Li gorî Ayşe Başaran avakirina civaka demokratîk bi modeleke welê pêkan e ku jin hêmana wê ya esasî ne, di nava mekanîzmayên biryardanê û îradeyê de hene, naxwe wê kêm bimîne û demokrasiyeke welê derkeve holê ku nikare bê meşandin.
‘BÊYÎ JINAN AŞTÎ Û DEMOKRASÎ BI SER NAKEVE’
Ayşe Acar Başaran anî ziman ku di pêvajoyên çareseriya şer de bi giranî nêzîkatiyeke bi serweriya mêr tê nîşandan û destnîşan kir ku jin ne tenê li dora maseya muzakereyê, piştre jî di pêvajoya avakirina civakî de divê diyarker bin. Ayşe Acar Başaran careke din destnîşan kir ku bêyî jinan pêvajo bi ser nakeve û got, gelekî girîng e ku Rêber Apo tundiya li nava malê û kuştina jinan weke nîşaneyên rojane yên kolekirina dîrokî pênase kir.
‘LI DIJÎ JINAN ŞEREKÎ GLOBAL HEYE’
Ayşe Acar Başaran ragihand ku dema ew bala xwe didin ser tabloya li Tirkiye, Kurdistan, Rojhilata Navîn û Ewropayê dibînin ku li hemberî jinan êrişeke pir alî heye. Başaran bi bîr xist ku li Tirkiyeyê her roj herî kêm jinek tê kuştin, tundî li dehan jinan dibe û diyar kir ku gotinên dijminatiya li jinan bi destê siyaset û medyayê jinûve tê hilberandin.
Ayşe Acar Başaran destnîşan kir ku li Ewropayê jî jin bi newekheviyeke zayendî ya civakî ya ‘ziravkirî’ re rû bi rû ne û anî ziman ku newekheviya mûçeyan û kuştina jinan li vê derê jî pirsgirêkeke cidî ye. Her wiha ragihand ku li Rojhilata Navîn jin ji ber mafên xwe yên bingehîn û azadiya xwe dibin hedef.
Başaran got, “Ev tablo tabloyeke şer e” û destnîşan kir ku eger daxwaza veguherîna civakî tê kirin divê ev yek ji jinan destpê bike.
‘ROJAVA REWŞA ŞÊNBERBÛYÎ YA PARADÎGMAYA AZADIYA JINÊ YE’
Ayşe Başaran diyar kir ku modela li Bakur û Rojhilatê Sûriyeyê derketiye holê ne tenê ji bo herêmê di asta navneteweyî de xwedî wateyekê ye. Ayşe Başaran bi bîr xist ku êrişên li ser Rojava dewam dikin û got, “Paradîgmaya Jin, Jiyan, Azadî ne tenê dirûşmek e; modeleke ku li Rojava bi cih hatiye anîn.”
Başaran ragihand ku yek ji rojevên bingehîn ên 8’ê Adarê wê Rojava be û got, wê bi gotina “Rojava warê jinên azad e, em ê biparêzin” dakevin qadan.
Ayşe Acar Başaran diyar kir ku muxatabê sereke yê pêvajoya heyî Rêber Apo ye û gelekî girîng e ku xwedî mercê azad ê jiyan û karkirinê be.
‘EM LI HER DERÊ DAKEVIN QADAN’
Ayşe Başaran bang li jinan hemûyan kir ku beşdarî çalakiyên 8’ê Adarê bibin û diyar kir ku 8’ê Adarê di heman demê de wekke amadekariya Newrozê ye.
