Piştî ku Hevşaredarê Colemêrgê yê Partiya Wekhevî û Demokrasiyê ya Gelan (DEM Partî) hat binçavkirin û îro hat girtin li ber şaredariyên li Kurdistanê çalakiyên nobetê hatin destpêkirin, çalakî di roj 2’emîn de berdewam dike.
AMED
Li ber Şaredariya Bajarê Bezin a Amedê û 13 şaredariyên navçeyan çalakiya nobetê di roja 2’emîn de ye. Hevşaredar, endamên meclîsê û gelek nûnerên saziyên civaka sivîl tevlî nobetê bûn.
Li navçeya Sûrê di nobeta ku dihat girtin de dengbêjan jî cihê xwe girt. Girseyê bê navber dirûşmeya “Colemêrg ya me ye” berz kirin. Çalakî bi klaman didome.
SÊRT
Çalakiya li ber şaredariya Sêrtê jî di roja 2’emîn de berdewam dike. Gelek kes tevlî çalakiyê bûn û bi dirûşmeya biryara qeyûm protesto kirin. Li Misirc û Ziyaretê jî çalakî hatin destpêkirin.
ÊLIH
Li Êlihê jî çalakî di roja 2’emîn de li ber şaredariyê didome. Rêxistinên civaka sivîl û nûnerên partiyên siyasî tevlî çalakiyê bûn. Di çalakiyê de bêyî navber dirûşmeyên “Zext nikarin me biçewisînin” hatin berzkirin.
