Bandora neyînî ya mejiyê baviksalar a li ser civakê û pêwîstiya bi guhertina vî mejî li Bakur û Rojhilatê Sûriyeyê rojeva bingehîn e. Ji bo dawî li newekheviyê bê anîn perwerdekirina mêr esas e. Bi rêya perwerdeyê tê xwestin, mejiyê mêr bê guhertin. Yek ji destketiyên girîng ên şoreşa jinê jî ev e.
Ji Komîteya Perwerdeyê ya Kongra Star Rohilat Muslim, ji beşdarên dewreya perwerdeyê ya Kongra Star Mesûd Yûsif û Baqî Hemza li ser girîngiya guhertin û veguhertina mejiyê bi serweriya mêr ji ANF’ê re axivîn.
ŞERT E KU MEJIYÊ BAVIKSALAR BÊ GUHERTIN
Rohilat Muslim anî ziman ku mejiyê baviksalar zêdeyî hezaran sal in reh berdaye nava jiyanê, bi vî rengî li nava civakê mayinde bûye û got, “Ji bo ev mejî bê guhertin, yekane alternatîf perwerde ye. Guherîn û veguherîna mejiyê mêr ji aliyê Rêbertî ve hate destpêkirin. Bi vê armancê gelek dewreyên akademiyê hatin lidarxistin. Mejiyê bi serweriya mêr civak aniyê ber felaketekê. Ev rewş herî zêde bandorê li jinê dike. Dema ku rewş bi vî rengî be, mêr dibe her tişt, jin jî dibe ne tiştek; mêr bêqisûr, jin jî gunahkar tê dîtin. Pêwîstî bi guhertina vî mejî heye ku felsefeya hevjiyana azad di navbera jin û mêr de bê avakirin. Li gel mêr divê jin jî bi perwerdeyê bê zanekirin û birêxistinkirin.”
BI PERWERDEYÊ RE BER BI GUHERÎN Û VEGUHERÎNÊ
Rohilat Muslim diyar kir ku perwerdeya wan a destpêkê li Kantona Efrîn-Şehbayê destpê kir, piştre li tevahiya Bakur û Rojhilatê Sûriyeyê belav bû û got, “Mirov dikare bibêje ku di perwerdeya de guherîn û veguherîn pêk hat. Ji bo rastiya hilweşîner a mejiyê bi serweriya mêr bê fêhmkirin bernameyên me hene. Ya rast, yekemcar rastiya xwe nas dikin, xwe dixin nava lêpirsînekê. Di encama lêpirsînên kûr de pêvajoya xwe naskirin, dîtin û veguherînê destpê dike. Bi şaşitiyên xwe dihesin. Dibînin ku serwer nînin. Ya herî girîng jî ew e ku mejiyê serweriya mêr qebûl dikin. Qebûlkirin û îqnabûn qonaxa herî girîng a veguherînê ye.”
MÊR Ê LI ZAYENDÎPERESTIYÊ MIKUR BÊ, WÊ WERE GUHERTIN
Rohilat Muslim destnîşan kir ku mêr ên guherîne, dema ku tevlî nava civakê dibin hingî şert û mercên hevjiyana wekhev diafirînin û got, “Bi pêşîgirtina li tundî, zext û zilmê re asta aramiyê ya civakê jî bilind dibe. Jiyaneke wekhev û demokratîk bi xwe re tîne. Zayendîperestî bi temamî ji holê neyê rakirin jî tê kêmkirin û civak dikeve ser rêya guherînê. Zehmet e ku mirov bibêje ev guherîn bi hemû mêran re heye. Di nava mêrên ku li tundî, zilm, zext û zayendîperestiyê mikur tên û hewl didin xwe biguherînin, guherîn û veguherîn tê dîtin.”
TÊKOŞÎNA JINAN MEJIYÊ MÊR TÊK BIR
Yek ji beşdarên dewreya perwerdeyê ya Kongra Star a ji bo mêran Mesûd Yûsif anî ziman ku jinên pêşengiyê li Rojava dikin, ne tenê li Rojava li tevahiya welatên Rojhilata Navîn bi mejiyê serweriya mêr re têdikoşin û pêşî li guherîn û veguherînê vedikin. Mesûd Yûsif diyar kir ku berxwedana jinan dibe sedem ku mêr lêpirsîna xwe bikin û got, “Encama vê lêirsînê jî têgihiştina zayendîperestiyê afirand. Bêguman ev yek bi destê mêran nehate afirandin. di encama têkoşîna jinan a li hemberî mejiyê bi serweriya mêr de ev destketî hate afirandin. Avakirina sîstema hevserokatiyê li Bakur û Rojhilatê sûriyeyê destketiyeke mezin bû. Pêşketinên hem li nava civakê hem jî li nava saziyan, destketiyên hatin bidestxistin di encama vê sîstemê de pêk hatin.”
ZEHMET E KU XISARÊN WÊ DI DEMEKE KURT DE JI HOLÊ BÊNE RAKIRIN
Mesûd Yûsif işaret bi dewreya perwerdeyê kir û got, “Nepêkan e ku xisarên mejiyê serweriya mêr di nava rojek, du rojan de ji holê bêne rakirin. Em mirovên ji Rojhilata Navîn in. Bi vî mejî ji dayik bûn û mezin bûn, lewma ne hêsan e ku dest ji vê yekê berdin. Ez bêteredût beşdarî dewreya perwerdeyê ya Kongra Star bûm. Di nava pêvajoya perwerdeyê ya mehekê de me dît û nirxand bê mejiyê bi serweriya mêr çawa reh berda her qada jiyanê û rêbaza xwe ya têkoşînê ya li hemberî vê yekê me di ber çavan re derbas kir.”
NEWEKHEVÎ BI TÊKOŞÎNA JINÊ JI HOLÊ TÊ RAKIRIN
Beşdarekî din ê dewreya perwerdeyê ya Kongra Star Baqî Hemza jî destnîşan kir ku pêşengiya jinê ya ji Şoreşa Rojava re hêmana esasî ya serketinê ye û got, “Guhertina mejiyê bi serweriya mêr, pêşketina ber bi lêgerîna li azadiya mêr bi têkoşîna jinê bi pêş ket. Eger em bala xwe bidin ser dîrokê, wê bê dîtin ku jiyana bi destê jinê hatiye avakirin ji aliyê mêr ve hatiye dizîn. Bi vî rengî her roja ku derbas bû zext, tundî û zilma li nava civakê zêde bû. Newekheviya navbera zayendan civak ser û bin kir û cîhaneke ne demokratîk û newekhev afirand. Ev newekhevî îro bi têkoşîna jinan ji holê tê raıkirin. Jinên ku îdeolojiya azadiya jinê ya Rêber Apo ji xwe re kiriye rêber, li her qada jiyanê bi têkoşîna xwe maf bi dest xistin û sîstema hevserokatiyê ava kirin. Eger şoreş gihîştibe vê astê, bi saya jinan e ku li dijî DAÎŞ’ê şer kirin û pêşengî ji hemû saziyên civakê re kirin.”
JIN JI ALIYÊ JINAN VE TÊ AVAKIRIN
Baqî Hemza işaret bi destketiyên dewreya perwerdeyê kir û got, “Bi hêza jinê hesiyam. Min dît ku jin avakarê jiyanê ye û îqna bûm ku jiyana bi şertên wekhev ên bi jinê re wê civakê bi pêş ve bibe. Jiyaneke wekhev wê asta pêşketinê ya civakê zêde bike. Heta ku jin ne azad be civak û mêr jî azad nabe. Hevdu temam dikin. Me careke din hêza guherînê ya jinê dît ku bi felsefeya ‘Jin, Jiyan, Azadî’ pêk tîne.”
