Navenda Ragihandin û Çapemeniya Hêzên Sûriya Demokratîk (QSD) bi daxuyaniyekê nivîskî ragihand ku Tîmên Operasyonên Leşkerî (TOL) ên QSD’ê bi piştevaniya hêzên Koalîsyona Navneteweyî li gundewarê Dêrazorê operasyoneke ewle pêk anî, di encamê de berpirê şaneyeke DAÎŞ’ê û pisporê amadekirina teqemeniyan girt.
Di daxuyaniyê de ev agahî hatin parvekirin: “Tîmên Operasyonên Leşkerî (TOL) ên girêdayî QSD’ê şeva berê li gundewarê Dêrazorê operasyoneke ewlehî li dijî endamekî şaneya rêxistina DAÎŞ’a terorîst, pêk anî.
Bi piştevaniya Koalîsyona Navneteweyî û piştî hêzên me agahiyên li ser terorîstê bi navê ‘Henan Cabir El Elî’ ku bi ‘Ebî Mihemed’ tê naskirin kom kirin, hêzên me operasyon pêk anî, cihê veşartina wî dorpêç kir û ew girt.
Terorîstê hatiye girtin, berpirsê şaneyeke rêxistina DAÎŞ’ê û pispora amadekirina teqemeniyan bû. Hêzên me agahî wergirtin ku wî made û amûrên teqemeniyê dida şaneyên terorîst, ku êrîşên terorane li dijî hêzên me, sivîl û saziyên sivîl ên li herêmê pêk bîne.
Hêzên me gelek çek û cebilxane dîtin û desteser kirin.
Hêzên me diyar dikin ku ew di operasyonên xwe yên ewlehî û leşkerî li dijî şaneyên rêxistina DAÎŞ’a terorîst de, têkbirina veşartgehên wan de dewam dikin, ku ewlehî û aştiya civakî li herêmê biparêzin.”
