Îro 27’emîn salvegera komploya navnetewî ya dijî Rêber Apo ye. Bi armanca şermezarkirina komploya navnetewî li ber navenda Meclîsa Xweser û Demokratîk a Şengalê (MXDŞ) ya li geliyê Kersê daxuyaniyeke çapemeniyê hate dayîn.
Daxuyanî bi tevlîbûna TAJÊ, Ciwan û hemû saziyên Şengalê ve ji aliyê Endamê Akademiya Zanista Civakî ya Abdullah Ocalan a Şengalê Kendal Çiya ve hate xwendin.
‘KOMPLO BI TÊKOŞÎNÊ HATE TÊKBIRIN’
Daxuyanî bi şermezarkirina komployê destpê kir û şehîdên di têkoşîna dijî komploya navnetewî de canê xwe fedakirine hate bîranîn û wiha hate gotin: ‘‘Em 27’emîn salvegera 15’ê Sibatê ya komploya navnetewî ya dijî Rêber Apo û gelê Kurd şermezar dikin. Bi komployê qirkirina gel û baweriyên Rojhilata Navîn hate hedef kirin. Gelê me ji kêliya destpêkê ya komployê ve armancên pişt komployê fêmkir û kete tevgerê. Hemû şehîdên azadiyê yên di têkoşîna li dijî komployê de canê xwe fedakirine birêzdarî bibîrtînin. Rêber Apo û gelê me bi sekin û têkoşîna xwe ya bênavber, komployê kirin sedema mezinkirina têkoşîneke bênavber a azadî û demokrasiyê. Têkoşîna Rêber Apo, gel û gerîlayên azadiyê, hebûna gelê Kurd û gelên azadîxwaz bi hemû cîhanê da qebûlkirin. Komploger bi girtina Rêber Apo re dixwestin, têkoşîna azadiyê ya gelê Kurd û hemû gelên azadîxwaz tune bikin. Lê bi mezinkirina têkoşînê ev plan têkçû, gelê me xwe zêdetir rêxistin kir û têkoşîna xwe gerdûnî kir.’’
‘KOMPLOYEKE NÛ TÊ MEŞANDIN’
Di dewama daxuyaniyê de hate gotin, tevî bangên Rêber Apo jî hêzên şerxwaz di têkbirina aramiya herêmê de bi israrin û wiha berdewam kir: ‘‘27 sale Rêbertiya me dibin tecrîdeke dijwar de tê girtin. Rêbertî, li hember siyaseta wan a tecrîdkirinê grava Îmraliyê veguherand akademiyeke pêşxistina fikrê civaka demokratîk. Di demeke ku Rojhilata Navîn kirine qadeke şerên qewmî, mezhebî û olî, Rêbertî fikra netewa demokratîk a bihevre jiyankirina gelan pêşxist. Bi vî awayî xwest pêşî li fitneyên nû yên navbera gelan de bigire. Ji bo vêya jî Rêber Apo xwest, 27’ê Sibata 2025’an pêvajoya aşitiyê li Tirkiyeyê û hemû herêmê pêşbixe.’’
‘ÊRİŞÊ PARADÎGMAYA RÊBER APO YA NETEWEYA DEMOKRATÎK TÊ KİRİN’
Di daxuyaniya de îşaret bi êrişên li ser paradîgmaya Rêber Apo ya netewa demokratîk jî hate kirin û wiha hate gotin: ‘‘Banga aşitî û civaka demokratîk weke manîfestoya sedsalê bû. Hêzên şerxwaz yên dijî aşitiyê li hember vê hemleya Rêber Apo ya ji bo parastina gelê Kurd û hemû gelan, pêleke nû ya şer li herêmê pêşxistin. Ji bo Kurd di nîzama nû ya herêmê de cih negirin, li Helebê bi rêya HTŞ’ê û komên çete yên ser bi dewleta Tirk êrişê civaka Kurd û Êzidî kirin. Êrişên dijî Rojava û Helebê, bi erêkirina hêzên navnetewî pêkhatin. Biryara êrişê li Fransayê hate girtin û li Helebê kete meriyetê. Ev jî weke komployeke nû ya 15’ê Sibatê bû li dijî gelê Kurd û gelên azadîxwaz yên herêmê. Bi van êrişan xwestin fikrê Neteweya Demokratîk a Rêber Apo ku bihevre jiyankirina gelan esas digire ji holê rakin. Her wiha di şexsê Rojava de xwestin dawî li hebûna Kurdê Azad û nîzama civaka demokratîk bînin. Rêber Apo ku vêya pêşdîtibû û hişyarî kiribû, ji Îmraliyê tevî hemû derfetên kêm û zextan jî roleke mezin lîst û pêşî li encamgirtina komploya duyemîn girt. Her wiha di serî de gelê Kurd û civaka Êzidî, hemû dostên gelê me li her devera cîhanê ketin tevgerê û li pişt biryara berxwedanê ya Rojava sekinîn. Berxwedana Rêber Apo, gel û şervanan pêşî li planên qirkirinê girtin. Lê komplo hîn jî dewam dike.’’
‘PİŞTÎ SÛRİYEYÊ Niha GEF Lİ IRAQ Û ŞENGALÊ DİXWİN’
MXDŞ’ê di daxuyaniyê li ser bandorên komploya navnetewî ya li ser Şengalê jî bal kişand ser gefên dewleta Tirk ên li ser Êzidiyan û ev hate gotin: ‘‘Niha jî berpirsên dewleta Tirk a dagirker piştî Sûriyeyê gefa êriş û qirkirinê li gelên Iraqê û bi taybet jî li Şengalê dixwin. Hakan Fîdan eşkere gef li civaka me ya Êzidî xwar ku hîn jî birînên me yên fermanê ne hatine pêçan. Herçend dewleta Iraqê hişyarî dabin dewleta Tirk jî, ji bo pêşî li êrişên li ser gelê me bigire helwesteke têrker û cihê baweriyê nîne. Şengal ji ber parçeyek ji axa Iraqê ye, her alozî û rewşeke neyînî ya li Şengalê rû bide, ewê gefê li hemû aramiya Iraqê bixwe. Divê Iraq serî ji zext û gefên dewleta Tirk re netewîne û neyê lîstikan. Em dikarin hemû pirsgirêkên xwe yên navxweyî bi dewleta Iraqê re bi diyalogê çareser bikin.’’
‘Jİ BO ÇARESERİYÊ EM Jİ DİYALOGÊ RE AMADE NE‘
Di daxuyaniyê de hate diyarkirin ku MXDŞ’ê ji diyaloga bi dewleta Iraqê ji bo çareserkirina pirsgirêkan amadeye û wiha hate gotin: ‘‘Em weke Rêveberiya Xweser û civaka Êzidî amade ne ku hemû pirsgirêkên xwe bi rêya diyalogê bi Iraqê re çareser bikin. Lê mixabin, em dibînin ku berovajiyê daxuyaniyên fermî yên dewletê, hinek plan li dijî herêma me dixin tevgerê. Çawa li Afganîstan û Sûriye, El-Qaîde, Talîban û HTŞ, fermî kirin û kirin dewlet, em dibînin li Iraqê jî çeteyên DAIŞ’ê, di bin navê Heşda Sûnî de tên komkirin û fermîkirin. Em weke civaka Êzidî vê biryarê xeter dibînin û qebûl nakin. Nabe çete werin fermîkirin û kiraseke qanûnî li wan were kirin.
BANGA JI BO IRAQ û GELAN
MXDŞ’ê bang li Iraqê kir ku pirsgirêkên civaka Êzidî bi rêyên siyasî û hiqûqî çareser bike û ev hişyarî jî hate kirin: ‘‘Em bang li dewleta Iraqê dikin ku pirsgirêkên civaka Êzidî û Şengalê bi rêyên hiqûqî û siyasî çareser bikin. Herweha em bang li raya giştî û tevahî civaka Êzidî dikin ku li hember van lîstokan şiyar bin û bêdeng nemînin, ji bo pêşî li fermanên nû venebe.’’
‘DİVÊ MAFÊ HÊVİYÊ Jİ BO RÊBER APO WERE NASKİRİN’
Di dawiya daxuyaniyê de jî MXDŞ’ê xwest mafê hêviyê ji bo Rêber Apo were naskirin û ev bang hate kirin: ‘‘Dewleta Tirk a di alozî û şerên li herêmê de roleke diyarîker dilîze, divê dawî li siyaseta şer bîne û guh bide bangên Rêber Apo yên ji bo aşitiyê. Rêya çareseriya mayînde û aşitiyeke birûmet jî di azadiya Rêber Apo re derbas dibe. Divê saziyên navnetewî ji bo naskirina mafê hêviyê ji bo Rêber Apo, erkên xwe bicîh bîne. Ji ber heya Rêber Apo azad nebe, wê şer li herêmê bi dawî nebe û hemû gelên me dibin metirsiya qirkirinê de bin.’’
