Yekîtiya Ragihandina Azad (YRA) nivîskar û rojnameger şehîd Seyît Evran, di 2’emîn salvegera şahadeta wî de, li Parka Xwendinê ya li Qamişlo yê Kantona Cizîrê bi bîr anî. Di hola parkê de wêneyên şehîd Seyît Evran hatin daliqandin, li jêr wêneyên wî gul, kamereyek û find hatin danîn.
YRA’yê proşûrek li ser jiyan, ked û xebata şehîd Seyît Evran û nameya wî ya dawîn a bi navê “Ber bi Rêwîtiya Dawî ve” li beşdaran belav kir. Nivîsa li ser jiyan, ked û xebata wî di bin gotina Seyît Evran a “Divê em karê xwe hîs bikin û nivîsên xwe bidin jiyîn, divê em di nava gel de bin, li kolan û taxan bigerin” de hat nivîsîn.
Rêveber û endamên YRA’yê, sazî û dezgehên ragihandinê, endam û rêveberên Tevgera Civaka Demokratîk (TEV-DEM), Partiya Yekîtiya Demokratîk (PYD) û Saziya Malbatê Şehîdan a Qamişloyê, hevrê û şagirtên şehîd Seyît Evran beşdarî bîranînê bûn.
Hevseroka YRA’yê Evîn Îbrahîm bixêrhatina beşdaran kir, çehîd Seyît Evran bi bîr anî û sersaxî ji malbatê re xwest.
Piştî kêliyek rêzgirtina ji giyanê şehîdan re merasîma bîranînê dest pê kir.
Şêwirmendê YRA’yê Bunyad Cizîrî axivî, iehîd Seyît Evran bîr anî û soza şopandina rêya Seyît Evran da. Bunyad Cizîrî qala welatparêziya malbat û kesayeta şehîd Seyîd Evran kir û got: “Heval Seyît Evran lêkolîn û lêgerîna xwe li ser rastiya gelê Kurd û doza Kurd meşand. Kesateyek şoreşger bû. Yek ji qadên ku heval Seyît Evran lê kedek mezin da jî Rojavayê Kurdistanê bû. Tevayî tecrûbe û zanista xwe bi ciwanan re parve kir. Li Rojava mîrateyek rojnamegeriyê nebû, heval Seyît û hevalên weke wî xebatên ragihandinê da destpêkirin. Niha jî heval û şagirtên wî kamera û pênûsa wî rakirine û xebata wî didomînin.”
Der barê jiyan û têkoşîna şehîd Seyît Evran de sînevîzyonek hat pêşandan.
Piştî sînevîzyonê Endama Rêveberiya Yekîtiya Ragihandina Jinê (YRJ) rojnameger Stêrk Gulo axivî û got: “Heval Seyît li ku bû civat û heqîqet li wir bû. Yek ji hevalê ku hişt ez ji rojnamegeriyê bikim heval Seyît bû. Heval Seyît hişek me yê mezin bû, stûnek me yê girîng bû. Windakirina wî windahiyek pir mezin bû. Dema min li Rojava dît, min lê nêrî ku ji min zêdetir Rojava nas dike. Ji gel hez dikir. Heval Seyît Evren generalê herî mezin ê Apê Mûsa ye. Ew bû rastiyek ê Kurdistanê û ji me re mîrateyek herî mezin hişt. Em jî soz didin wî ku şopdarên wan bin û sozdayîn pêkanîn e.”
Li ser navê malbatê xwarziya şehîd Seyît Evran, Sara Evran axivî û got: “Pir bi şans im ku hevala heval Seyît im. Bê şansim ku min pê re jiyan nekir. Min nivîsên wî xwendin, ez jî şagirtima wî me. Ne şert e ku mirov bi yekî re bijî. Ji bo ez valahiya nasnekirina wî derbas bikim, ez ê hertim bibin rêhevala wî.”
Sara Evran nameya dawî ya şehîd Seyît Evran ji beşdaran re xwend.
Piştre yek ji fermandarên Yekîneyên Parastina Jin (YPJ) Nesrîn Abdullah axivî û got: “Ez yek ji wan kesan bû ku rêhevala heval Seyît bûn. Me 2004’an hevdû nas kir û ez bi xwe di xebatên ragihandinê de bûm. Min hertim jêre digot Xoce. Di kêliyên ku şehîd ket jî silav şandin. Hinek heval xebatên heval Seyît dimeşînin, ez jî di nava xebatên parastinê de me. Me hertim ew li kêlka xwe dît û me dizanî dê hertim vê têkoşînê zindî bihêle û biparêz e. Ez jî soz didim ez ê hertim parêzvanê vê xebatê bim û domdarê rêya te bim”.
Piştî axaftinan, endamên Koma Botan Nesîn Botan û Danîş Botan her yekî stranek diyarî bîranîna şehîd Seyît Evran kirin.
Piştre beşdar serdana gora şehîd Seyît Evran a Pakrewangeha Şehîd Delîl Saroxan kir. Find danîn ser gora şehîd Seyît Evran û stranên bi Kurdî ku şehîd Seyît Evran jê hez dikir pê xistin.
Li ser navê Saziya Malbatên Şehîdan a Qamişloyê Mihyedîn Hesen axivî. Mihyedî Hesen tevayî şehîdên azadiyê bîr anî û got: “Em nikarin bi axaftinan heval Seyît Evran bînin ziman. Em sersaxî ji malbat wî re dixwazin. Heval Seyît kedeke mezin li herçar parçeyên Kurdistanê da û mirateyek bi rûmet li pey xwe hişt.”
Merasîma bîranînê bi dirûşma “Şehîd namirin” bi dawî bû.
