Girtiyê nexweş ê giran Mehmet Saît Yildirim (75) ê ku li Girtîgeha Tîpa F a Kiriklar a Îzmîrê tê ragirtin, di 24’ê Tebaxê de derket pêşberî Lijneya Îdarî û Çavdêriyê (ÎGK). Piştî hevdîtinê, Yildirim li odeya xwe krîza dil derbas kir. Piştî ku mafê wî yê tehliyeya bişert ji bo cara sêyemîn û bo sê mehan hate taloqkirin, li warê wî Kanîreşê daxuyanî hate dan. Rêxistinên Partiya Herêmên Demokratîk (DBP) û Partiya Wekhevî û Demokrasiyê ya Gelan (DEM Partî) yên Kanîreşê li ber avahiya navçeyê daxuyanî dan. Malbat, xizmên Yildirim û gelek welatî beşdarî daxuyaniyê bûn.
Hevserokê DBP’ê yê Kanîreşê Ozkan Bîngol bi bîr xist ku tevî ku ji meha Sibata 2025’an ve mafê berdana bişert ê Yildirim heye jî, tehliyeya wî tê astengkirin û ev tişt got: “Yildirim di civîna Lijneya Îdarî û Çavdêriyê ya di 24’ê Tebaxa 2026’an de bi helwesta tund a îdareyê û ferzkirina poşmaniyê re rû bi rû ma û piştî nîqaşên li lijneyê li odeya xwe krîza dil derbas kir. Piştî ku hevalê wî yê odeyê bi rewşê hesiya û agahî da, Yildirim berê sewqî nexweşxaneya Bucayê hate kirin, lê bi hinceta ku qawîşa girtiyan nîne sewqî Nexweşxaneya Bajar a Îzmîrê hate kirin.”
LI NEXWEŞXANEYÊ FERZKIRINA TEDAWIYA BI KELEMÇE
Bîngol diyar kir ku Yildirim di sibaha 25’ê Tebaxê de bi lezgînî hat anjiyokirin û ji ber ku yek ji damarên sereke yên dil girtî bû, 2 stent hatin bicihkirin û ev tişt got: “Tevî vê rewşa giran jî, di dema razana wî ya nexweşxaneyê de ji aliyê cendirmeyan ve hate xwestin ku li ser nivînê bê kelemçekirin. Ev sepana li dijî rûmeta mirovahiyê bi bertekan hate astengkirin. Ferzkirina tedawiya bi kelemçe li ser girtiyekî ku krîza dil a giran derbas kiriye û ji mirinê vegeriyaye, binpêkirina mafan e. Yildirim ê 75 salî, nexweşê dil ê giran û kronîk e, 30 salên xwe yên bênavber di girtîgehê de tijî kiriye û bi biryarên li dijî hiqûqê 21 meh in zêde di girtîgehê de tê ragirtin. Em daxwaz dikin ku Yildirim di mercên guncan ên li gorî rûmeta mirovahiyê de bê tedawîkirin û tavilê bê tehliyekirin.”
‘SEPANÊN KÊFÎ NE LI GORÎ PÊVAJOYÊ NE’
Piştî daxuyaniyê malbata Yildirim axivî. Ewil birayê Mehmet Saît Yildirim, Selîm Yildirim axivî û kesên di têkoşîna azadiyê de jiyana xwe ji dest dane bi bîr anî. Yildirim destnîşan kir ku birayê wî hevrêyê Mazlum Dogan û Hayrî Durmuş e û got ku ji ber ferzkirina poşmaniyê qebûl nekiriye înfaza wî hatiye şewitandin. Yildirim bal kişand ser Pêvajoya Aştî û Civaka Demokratîk û daxuyaniyên duh ên Serokkomar Recep Tayyîp Erdogan ên li Xelatê bi bîr xist û wiha pê de çû: “Ew bang li hemû kesî dike ku piştgiriyê bidin pêvajoyê, lê gelo helwestên kêfî yên dozger û lijneyên xwe nabîne? Ev sepanên zextê ne li gorî ruhê pêvajoya ne.”
Xuşka wî Hanim Yildirim jî bertek nîşanî rewşa birayê xwe da û got: “Birayê min nexweş e, ji dilê xwe anjiyo bû lê dîsa jî dixwazin destên wî kelemçe bikin. Ev zilm nayê qebûlkirin. Em dixwazin ku ew tavilê ji girtîgehê derkeve, bila mifeteyên kelemçeyan bê vekirin. Em bi salan e rêya wî dipên.”
