Endama Tevgera Jinên Kurd û siyasetmedar Sebahat Tûncel pêşnûme qanûna têkildarî pêvajoya çareseriyê ku tê payin bikeve rojeva meclîsê, têkoşîna azadiyê ya Kurd, banga civaka demokratîk û rola tevgera jinên Kurd ji ANF’ê re nirxand.
Sebahat Tûncel diyar kir ku Rêber Apo dema ku têkoşîna çekdarî ya 52 salan bi dawî kir, di mijara têkoşîna azadiyê ya gelê Kurd de nexşerêyeke nû danî holê û got, “Eger bê bîra we, yek ji daxuyaniyên dema destpêkê ew bû ku manîfestoya nû di asta Manîfestoya Rêya Şoreşa Kurdistanê de manîfestoyek e. Nêzîkatiyeke welê ye ku di sedsala yekemîn de gelê Kurd bigihîne azadiyê, Kurd çarenûsa xwe bi xwe diyar bikin û sîstemeke demokratîk û azadîparêz bi rêxistin bikin. Lewma pêwendiya xwe bi dewletê nîne.”
Tûncel ragihand ku Kurdan dest ji têkoşîna azadiyê bernedane, ev yek nayê wateya terikandina daxwazên xwe yên ji bo welatîbûna wekhev, azad û mafên xwe û got, “Lê belê van daxwazên xwe bi rêxistin dikin. Ev yek ne tiştekî welê ye ku ji dewletê re bê hiştin an jî çav li dewletê be.”
‘HÊZA RÊXISTINBÛYÎ YA KURDAN WÊ PÊVAJOYÊ DIYAR BIKE’
Sebahat Tûncel destnîşan kir ku rêveçûna pêvajoyê wê bi rêxistiniya xwe bi xwe ya Kurdan diyar bibe û got, “Yanî pêşveçûna vê pêvajoyê ji dewletê bêhtir bi Kurdan ve ggirêdayî ye. Yanî eger Kurd xwe bi rêxistin bikin, rêxistiniya xwe xurt bikin, siyaseta demokratîk mezintir bikin, wê vê pêvajoya avakirinê bi ser bixînin. Naxwe eger ji dewletê re bimîne, dawiya dawî bêyî ku mafekî bide Kurdan dixwaze her tiştî jê bistîne. Ji ber vê yekê cewhera meseleyê bi pirsgirêka Kurd pênase nake. Lê belê em zanin ku sedema rûdana van hemûyan, sedema destpêkirina têkoşîna çekdarî pirsgirêka Kurd e. Heta ku pirsgirêka Kurd çareser nebe, Tirkiye demokratîk nabe. Heta ku Tirkiye demokratîk nebe jî zehmet e ku pirsgirêka Kurd çareser bibe.”
Tûncel anî ziman ku rêxistiniya civakê hêza diyarker a pêvajoyê ye û bi bîr xist ku Rêber Apo di vê mijarê de got, “Beşa ku pêwendiya xwe bi dewletê re heye ji sedî 10 e, ji sedî 90 ê mijarê avakirin û rêxistiniya paşeroja gel bi xwe ye.”
‘JIN WÊ BIBIN HÊZA PÊŞENG A VÊ PÊVAJOYÊ’
Tûncel bal kişand ser rola pêşeng a jinan a di têkoşînê de û ev nirxandin kir, “Jinên Kurd di têkoşîna azadî û wekheviyê ya Kurdan de li refên herî pêş cih girtin. Kedeke mezin dan, berdêlên mezin dan. Cewhera manîfestoya dawî ya Birêz Ocalan avaniyeke komînal, civakî pêşniyar dike ku azadiya jinê ji xwe re dike esas. Lewma hêza pêşeng jî wê jin be.”
‘QANÛN BÊ DERXISTIN, VEGERA LI WELÊT WÊ GIRÎNG BE’
Tûncel bal kişand ser nêzîkatiya Kurdênn li Ewropayê ya li pêvajoyê û têkiliya navbera dîaspora û welêt û destnîşan kir ku bi danîna zemîna qanûnî re vegera li welêt wê girîng be. Tûncel got, “Kurd li dîasporayê dimînin. Lê belê dilê wan hemûyan li Kurdistanê lê dide. Lewma li pêşberî bûyerên li Kurdistanê diqewimin kor, kerr û lal nînin.”
Tûncel got, “Li Ewropayê jî bi pirsgirêkên gelekî cidî re rû bi rû ne. Krîza aboriyê, pirsgirêka perwerdeyê, pirsgirêka tenduristiyê; li vê derê jî bi gelek pirsgirêkan re rû bi rû ne. Lê belê berê xwe dane Kurdistanê. Eger rê bê vekirin û qanûn bê derxistin, vegera li welêt wê girîng be. Yanî her tim baş e ku berê xwe li welêt be.”
