Seyîd Riza û hevrêyên wî di 88’emîn salvegera darvekirina wan de li gelek bajaran bi çalakiyên curbicur hatin bibîranîn.
ŞIRNEX
Li navenda Şirnexê ji aliyê Platforma Saziyên Demokratîk ve ji bo salvegera 88’emîn a darvekirina Seyîd Riza û hevrêyên wî daxuyanî hat dayîn. Parlamenterên DEM Partiyê yên Şirnex Newroz Ûysal Aslan û Mehmet Zekî Îrmez, endam û rêveberên partiyên siyasî û saziyên civaka sivîl û gelek welatî tev li daxuyaniya li ber avahiya DEM Partiyê hate dayîn bûn.
Daxûyanî tenê bi Tirkî hate dayîn. Piştre Parlamenter Mehmet Zekî Îrmez axivî û diyar kir ku ew di kesayeta Seyîd Riza û hevrêyên wî de hemû cangoriyên Terteleya Dêrsîmê bi bîr tînin û wiha got: “Ji roja ku Komara Tirkiyeyê hatiye avakirin heta îro li ser yek netewê hatiye avakirin. Li dijî vê yekê serhildanên gelê Kurd hatin destpêkirin û bi hezaran welatiyên me hatin qetilkirin. Gelê Dêrsimê di serdema Osmaniyan de 600 salan bi awayek xweser jiyan dikir. Bi avakirina komarê re li ser xweseriya Dersîmê êriş pêk hatin.”
Mehmet Zekî Îrmez di dawiya axaftina xwe de bal kişand ser pêvajoya Aştî û Civaka Demokratîk û got: “Xwestekên gelê Kurd, xwestekên gelê Dêrsimê hene. Divê dewlet di vê pêvajoyê de bi van rastiyan re rû bir û bîmîne û rastiya van pêkanîna derxe holê. Divê dewlet cihê gorên kesên hatine qetilkirin eşkere bike, heya ku ev yek pêk neyê mirov nikare qala pêvajoyek serkeftî bike.”
Daxuyanî bi berzkirina dirûşmeya “Seyîd Riza rûmeta me ye” bi dawî bû.
WAN
Platforma Saziyên Demokratîk a Wanê, bi boneya salvegera 88’emîn a darvekirina Seyîd Riza û hevrêyên wî li Kolana Hunerê ya Wanê daxuyanî da. Di daxuyaniyê de pankarta “Em qirkirina Dêrsimê ji bîr nakin, em Seyîd Riza û hevrêyên wî bi rêzdarî bi bîr tînin” hat vekirin. Hevşaredarê Bajarê Mezin ê Wanê Abdullah Zeydan, Parlamenterê DEM Partiyê Mahmûd Dîndar, hevserokên DBP û DEM Partiyê yên Wanê û gelek kes tev li daxuyaniyê bûn.
Metna daxuyaniyê tenê bi Tirkî hate xwendin. Metna daxuyaniyê ji hêla rêveberê DEM Partiyê Îlhan Gunay ve hat xwendin. Îlhan Gunay diyar kir ku Terteleya Dêrsimê ku di dîroka komarê de rûreşiya herî mezin e û pergala netew-dewletê ya li dijî bawerî û nasnameyan nayê qebûlkirin. Îlhan Gunay da zanîn ku hişmendiya yekparêz dixwaze bi qetlîaman, polîtîkayên bişaftinê hwd. xwe li ser pêyan bigire û wiha got: “Avakirina komareke demokratîk bi guherandina kodên kevneşopî û înkarê yên netew-dewletê pêkan e. Banga ‘Aştî û Civaka Demokratîk’ ya rêzdar Ocalan, di heman demê de banga eşkerekirina heqîqetan, pêkanîna edaletê û parvekirina êşan e. Rûbirûbûna bi Komkujiya Dêrsimê re ji bo pêkvejiyanê pêdiviyeke mezin e û bidawîkirina polîtîkayên bêgoriyê û eşkerekirina cihên gorên Seyîd Riza û hevrêyên wî ji bo aştiyeke mayînde gelek girîng e. Em careke din Seyîd Riza û hevrêyên wî yên ku têkoşîneke bêhempa dane bi bîr tînin û li ber bîranîna wan bejna xwe ditewînin.”
Daxûyanî bi çepikan bi dawî bû.
AGIRÎ
Di merasîma bîranînê ya ji bo Seyîd Riza û hevalên wî de ku li avahiya DEM Partiyê ya Agiriyê hate lidarxistin, endamên DBP, rêxistinên bajar û navçeyan ên DEM Partî, MEBYA-DER, DÎK û gelek kesên din beşdar bûn. Bîranîn bi deqeyeke rêzgirtinê ji bo Seyîd Riza û hevalên wî dest pê kir. Endamê DÎK’ê Îlhan Tan di merasîma bîranînê de axaftinek kurt kir û got: “Bi sedsalan e ku zordar, barbar û bedewiyan Kerbelayê anîn serê gelê Kurd. Îro roja şehîdbûna Seyîd Riza ye. Lê gora Seyîd Riza hîn jî tê veşartin. Em dixwazin ev yek ji raya giştî re were eşkerekirin û bîranînên li gorî Seyîd Riza werin lidarxistin.”
Piştî axaftinê sînevîzyonek hat nîşandan ku behsa têkoşîna Seyîd Riza û hevalên wî û komkujiya wî dikir.
ERZIROM
Seyîd Riza li navçeya Qereyazî ya Erziromê jî ji aliyê Platforma Saziyên Demokratîk (DEKUP) ve hat bibîranîn. Gelek kes beşdarî daxuyaniyê bûn ku di bin berfê de hat lidarxistin. Hevserokê DBP’ê yê Bajêr Ramazan Karakaş di çalakiyê de axivî û diyar kir ku dê têkoşîna Seyîd Riza û hevalên wî bi aştî û civakeke demokratîk tacîdar bikin.
Her wiha li Mûş û Bedlîsê jî bi heman armancê çalakî hatin lidarxistin.
