Buroya Neteweyî ya Dijî Gendeliyê ya Ukraynayê (NABU) ragihand ku Galouchtchenko dema hewl dida ji welat derkeve, li ser sînor hatiye girtin.
Di daxuyaniya NABU’yê de hat diyar kirin ku ev binçavkirin di çarçoveya lêpirsîna bi navê “Midas” de pêk hatiye, ku par di sektora enerjiyê de derketibû holê. Her çend di daxuyaniya fermî de nav bi zelalî nehatibe dayîn jî, Galouchtchenko di sala 2025’an de wekî Wezîrê Enerjiyê erk kiribû û di mijdara heman salê de îstifa kiribû.
Rayedaran diyar kirin ku lêpirsîn di çarçoveya prosedurên hiqûqî de berdewam dike û dê di rojên pêş de agahiyên zêdetir werin parvekirin.
TORA BERTÎLÊ YA 100 MÎLYON DOLARÎ
Lêkolînerên NABU’yê destnîşan dikin ku di sektora enerjiyê de toreke bertîl û fîhilîna pereyan a nêzî 100 milyon dolarî hatiye avakirin.
Hat îdîakirin ku di çarçoveya lêpirsînê de, kesekî nêzî Serokê Dewleta Ukraynayê Volodymir Zelenskiy jî di nav gumanbaran de ye. Rayedaran diyar kir ku Galouchtchenko ji vê sîstemê “berjewendiyên kesane” bi dest xistine.
Ev skandal, di demekê de ku ji ber êrîşên Rûsyayê li seranserê welat qutbûna elektrîkê zêde ye, bû sedema nerazîbûneke mezin a gel. Têkoşîna li dijî gendeliyê, wekî yek ji şertên sereke yên pêvajoya endamtiya Ukraynayê ya Yekîtiya Ewropayê tê dîtin.
