TEV-Çand-Ewropayê (Tevgera Çand û Hunera Kurd a Ewropayê), di salvegera wefata wî de hunermend û kedkarê çandê yê Kurd Hozan Zinar bi bîr anî û diyar kir ku ked û tevkariyên wî yên ji bo ziman, çand û têkoşîna azadiyê ya Kurd nayên jibîrkirin.
Di peyama bîranînê ya hatî weşandin de hate destnîşankirin ku hunermend Zinar, her çend bi çavên xwe Kurdistan nedîtibe jî, bi ruhê xwe evîndarekî Kurdistanê bû. Di daxuyaniyê de hate bibîrxistin ku malbat û bav û kalên wî, mîna gelek malbatên Kurd, bi darê zorê ji Kurdistanê hatine sirgûnkirin û li Anatolyayê hatine bi cih kirin, piştre jî ji ber şert û mercên jiyanê tevî malbata xwe koçî Hollandayê kiriye.
Di daxuyaniyê de hate diyarkirin ku Zinar ji temenê xwe yê ciwanî ve hem xebitiye û hem jî ji bo mafên karkeran têkoşiyaye, stran ji bo kedkaran gotine û lêgerîna wî ya di dirêjahiya jiyana wî de, di destpêka salên 1980’yî de bi têkoşîna azadiya neteweyî ya gelê Kurd re gihîştiye yekbûnê.
TEV-Çandê bal kişand ku Hozan Zinar di vî pêvajoyê de beşdarî xebatên Hunerkom û Koma Berxwedanê bûye, bi vî rengî di qada çand û hunerê de bûye yek ji têkoşerên doza azadiyê ya gelê Kurd.
“Mîna her hunermendekî Hunerkomê, wî jî bi tembûr, deng û keda xwe beşdarî têkoşînê kir. Heval Zinar bi deng û hunera xwe rengekî cuda da xebatên Hunerkomê.”
Tevgera çandê di dawiya peyama xwe de, di şexsê Hozan Zinar de hemû kedkarên têkoşînê yên di eniya çandê de jiyana xwe ji dest dane bi bîr anîn û dilsoziya xwe ya bi mîrasê wan re anî ziman. Saziyê diyar kir ku ew parastin û pêşxistina ziman, çand û hunera Kurd wekî emanetekî şehîdan dibînin û xwedîderketina li vî emanetî wekî yek ji berpirsiyariyên xwe yên bingehîn dinirxînin.
