Di konê sersaxiya şehîd Ziyad û hevrêyên wî de, şêniyên Kobanê ji ANF’ê re axivîn û diyar kirin ku xeta ziyadan bi ser ketiye.
Dayîka bi navê Emîna Şêxo wiha axivî: “Em ê bi şehîdên xwe bigihêjin serkeftinê. Em van êrîşên qirêj û hov şermezar dikin, keçên me şehîd dibin û cenazeyên wan li baniya diavêjin. Ez bang li her çar parçeyên Kurdistanê dikim ku êdî rabin ser piyan. Fermandarê me Ziyad soza berxwedanî da û canê xwe feda kir. Em bi saya van hevalan hene. Qaşo mafê mirovan heye, her kesî xwe bêdeng kir. Vaye rojane zarokên me qetil dikin. Em ê her tim li ber xwe bidin. Ev êrîş bi destê dewleta Tirk a qirêj pêk tê. Êdî heta noqteya dawî ya xwînê em ê rabin û li hemberî vê dagirkeriyê serî hil didin.”
Ji pêkhateya Ereb Mihemed Receb Mistefa anî ziman ku berxwedaniya li Helebê ne tenê ji bo parastina netewa Kurd bû, di heman demê de ji bo parastina netewa Ereb jî bû û got, “Em bi saya van hevalên ku berxwedaniyê dipejirînin hene. Çete di bin navê Îslamê de bi hezaran kesî ser jê dikin û qetil dikin, lê şervanên me berxwedaniyeke bê hempa li hemberî van qirkeran raber kir. Wê dîrok wan bi bîr bîne. Ev terorên ku ji hemû cîhanê rabûn, berê xwe dan herêmên me. Hikûmeta Colanî hemû biryarên xwe ji Erdogan û Hakan Fîdan digire. Em weke gel van kiryaran şermezar dikin. Du dewlet bi ser du taxan de hatin, em bi ser ketin û ew têk çûn.”
Dayîka bi navê Leyla Ehmed jî bilêv kir ku du dewlet li her du taxan têk çûn û ev tişt got, “Ew hov in, însaniyet jî li gel wan tune ye, ew dîktator in. Li pişt wan dewleta Tirk heye. Weke ji destpêka şoreşê û heta niha me bajarên xwe bi xwîna zarokên xwe av da û em bi ser ketin. Îro roja man û nemanê ye. Berxwedaniya Heval Ziyad diyar kir ku berxwedanî hebûnê diafirîne, em berxwedaniya şervanên xwe silav dikin. Ew kesên ku dibêjin Kurd wê tune bibin, dê serketina Kurdan bibînin. Du taxan du dewlet têk birin.”
