Bi pêşengiya Tevgera Azadiya Jinên Êzidî (TAJÊ) 4’ê Nîsanê Rojbûna Rêber Apo bi şahiyeke li Geliyê Kersê li Baxçê Serok Apo bi dirûşma ‘Rojbûna Rêber Apo Nûvejîna me ye’ hat pîrozkirin. Cihê şahiyê ku bi sedan kes tevlî bû, bi wêneyên Ocalan hatin xwemilandin û bênavber dirûşma ‘Bijî Serok Apo’ û ‘Rojbûna te pîrozbe ey Serok Apo’ hatin berzkirin.
Beriya destpêkirina şahiyê nirxandina Ocalan a li ser civaka Êzidî hat temaşekirin û guhdarkirin.
Piştre, axaftina vekirina şahiyê li ser navê Koordînasyona TAJÊ ji aliyê Sûham Şengalî ve hat kirin.
Di destpêka axaftina xwe de Sûham Şengalî 4’ê Nîsanê li Rêber Apo û hemû cîhanê pîroz kir û got: “Em ji çiyayên Şengalê wek jinên Êzidî û civaka Êzidî rojbûna Rêber Apo pîroz dikin û ji vir heta Îmraliyê silavên xwe ji Rêber Apo re dişînin. Em rojbûna Rêber Apo wek rojbûna kesekî nagirin dest, em wek rojbûna vejînê digirin dest û pîroz dikin. Rojbûna Rêber Apo rojbûna hemû jin û civakên azadixwaz e. Rêber Apo hemû emrê xwe ji bo azadiya civakên bindest feda kir.”
‘DIVÊ DESTÊ RÊBER APO XURT BIKIN’
Sûhûm Şengalî bal kişand ser peyama dîrokî ya Rêber Apo ya ‘Aştî û Civaka Demokratîk’ û got: “Di 27’ê Sibatê de Rêber Apo bi banga dîrokî xwest pirsgirêkên heyî ji zemînin şer derbasî derbasî zemîna aştiyê bike û ji bo vê bi salan kar û xebat kir. Ev bang bû deriyeke nû. Lê heta niha heta ji aliyê dewleta Tirk ve gavek nehatiye avêtin. Divê hemû jin û civakên bindest ji bo xurtkirina destê Rêber Apo çi ji destê wan tê bikin.”
‘AZADIYA RÊBER APO AZADIYA JIN Û CIVAKÊN BINDEST E’
Sûham Şingalî bal kişand ser peyam Ocalan a ji civaka Êzidî re şandibû û ev nirxandin kir: “Rêber Apo ji bo parastina bawerî û çanda Êzidiyatiyê peyam ji me re şand. Rêber Apo ji bo ev çand were parastin her bang kir û di peyama herî dawî jî ji me re got ku azadiya xwe bikin garantiyê. Ji hêla din ve roja hatina peyama Rêber Apo artêşa Iraqê êrÎşî şervanên YBŞ’ê kir. Ev planeke qirkirina civaka Êzidî ye. Rêber Apo ji me Êzidiyan berxwedan û rêxistinkirinê dixwaze. Heta dawiyê em ê bi fikrên Rêber Apo xwe hîn birêxistin bikin û ji bo xurtkirina destê Rêbe Apo em ê kar û xebat bimeşînin. Azadiya Rêber Apo azadiya jinan e, azadiya Rêber Apo azadiya civakên bidest e. Ji bo azadiya fîzîkî ya Rêber Apo çi ji me were xwestin em ê bikin. Dubare em 4’ê Nîsanê roja vejînê li hemû jinan û hemû civakên bindest pîroz dikin.”
Piştî axaftina vekirinê Koma Dîlanê ya Stiya Nexşa, Koma Zarokan a Şengalê, Dengbêjî, Koma Bêrîvan a Stiya Nexşa, Koma Çiyayê Şengalê û Koma Penaber a Mexmûrê ku wek mêvan ji Wargeha Şehîd Rûstem Cudî hatibûn şahiya 4’ê Nîsanê, derketin ser dikê û bi stran û dîlanên xwe gel coşandin.
Şahiya 4’ê Nîsanê bi govend, stran û dirûşmeyan bi dawî bû.
