Êrîşên dewleta Tirk û koma wê ya paramîlîter SMO’yê yên li dijî Bakur û Rojhilatê Sûriyeyê li gelek bajaran hatin protestokirin.
EDENE
Rêxistina DEM Partiyê ya Edeneyê li pêşiya avahiya xwe daxuyanî da. Hevserokên DEM Partiyê yên bajarên Edene, Mêrsîn, Osmaniye û Hatayê, nûnerên partiyên siyasî û rêxistinên civaka sivîl û gelek kes tevlî bûn.
Hevserokê DEM Partiyê yê Edeneyê Seyfettîn Aydemîr diyar kir ku avakirina Sûriyeyeke demokratîk û azad ji bo gelên Rojhilata Navîn girîng e. Aydemîr, êrîşên dewleta Tirk û koma wê ya paramîlîter a SMO’yê yên li ser Bakur û Rojhilatê Sûriyeyê şermezar kir û wiha got: “Lê ev yek eşkereye ku di serî de îktîdara siyasî ya Tirkiyeyê, hêzên herêmê çavberdane destkeftiyên gelê Kurd ku bi bedelên giran hatine bidestxistin. Bi taybet jî êrîşên ser Minbicê hatine dijwarkirin û Rojava dîsa ji hêla van hêzan ve hedef hatine girtin. Di vê pêvajoya dîrokî de divê her kes xwedî li Minbic û Rojava derkeve. Ev xwedîderketin ji bo gelê Kurd û gelên Bakur û Rojhilatê Sûriyeyê jiyanî ye. Tekane cihê hêviya jiyaneke birûmet lê heye Rojava ye û divê em bi tenê nehêlin. Ev, erka me ya sereke ye. Di vê çarçoveyê de em ê di sala 12’emîn a şoreşê de bi ruhê berxwedanê piştevaniyê bidin û bêdeng nemînin.”
Daxuyanî, bi çepikan bi dawî bû.
AGIRÎ
Rêxistina DEM Partiyê ya Agiriyê jî li avahiya partiyê daxuyanî da. Li gel rêveberên bajar û navçeyan, gelek welatî jî tevlî bûn. Ji rêveberên partiyê Cengîz Alkatmiş di daxuyaniyê de wiha got: “Êrîşa ser Minbicê, hewldana têkbirina çareseriya li Sûriye û Tirkiyeyê ye. Ev yek, deraqilî ye. Divê dev ji vê berdin. Êrîşa îktîdara AKP’ê ya li dijî destekeftiyên gelê kurd, dê îstîqrara Sûriyeyê taloq bike û agirê li Rojhilata Navîn gurtir bike. Banga me ji bo îktîdara AKP’ê ew e ku li dijî Sûriyeyê polîtîkayeke aştiyane bimeşîne û bi Rêveberiya Bakur û Rojhilatê Sûriyeyê re bikeve nav guftûgoyê. Divê îktîdara AKP-MHP’ê tavilê dev ji êrîşên dijminane yên li dijî destkeftiyên gelê Kurd berd e. Em careke din dibêjin; dê Minbic nekeve, Dêrazor nekeve, Rojava dê tu caran nekeve.”
Daxuyanî, bi dirûşmên “Bijî berxwedana Rojava” û “Zext nikarin me têk bibin” bi dawî bû.
SÊWEREG
Rêxistinên DEM Partî DBP’ê yên Sêwereg a Rihayê jî li Parka Lezgo daxuyanî dan. Di daxuyaniyê de pankarta “Em Êrîşên ser Rojava bi tundî şermezar dikin” û dovîza “Rojava rûmeta me ye” hatin hilgirtin. Hevserokê DEM Partiyê yê Sêweregê Alî Dusak bi bîr xist ku piştî êrîşên HTŞ’ê yên ser Helebê, êrîşên ser Rêveberiya Bakur û Rojhilatê Sûriyeyê jî zêde bûne. Dusak, da zanîn ku ji ber êrîşan gelek welatî ji warên xwe bûne û wiha got: “Balafirên şer û SÎHA’yên tirkan gelê me qetil dikin. Dixwazin li Rojava pêş bikevin.”
Daxuyanî, bi dirûşma “Bijî berxwedana Rojava” bi dawî bû.
