Çalakî bi pêşengtiya Partiya Herêmên Demokratîk (DBP), Partiya Wekhevî û Demokrasiyê ya Gelan (DEM Partî) û Tevgera Jinên Azad (TJA) hatiye destpêkirin. Komeleya Rojnamegeran a Dîcle Firatê (DFG), Komeleya Rojnamegerên Jin ên Mezopotamyayê (MKG), Komeleya Wêjekarên Kurd, PENa Kurd, Yekitiya Weşangerên Kurd (YEWKURD), Komeleya Lêkolînên Çanda Devkî Dîrok Wêjeyê (SOZ-DER), parlamenterên DEM Partiyê Ferît Şenyaşar, Dîlan Kunt Ayan, hevşaredarên DEM Partiyê, rêveberên DEM Partî û DBP’ê, pêkhateyên Platforma Ked û Demokrasiyê ya Rihayê, endamên Meclîsa Dayikên Aştiyê û gelek kesên din tevlî çalakiya îro bûn.
Hevşaredarê Xelfetiyê Mehmet Karayilan li vir axivî û got: “Hûn nikarin Kobanê ji Pirsûsê veqetînin. Kobanê bi têkoşîna gelên cîhanê hat bidestxistin. Niha jî li ser qadên jiyanê yên ku gel bi dest xistine, metirsî heye. Ev metirsî li ser hemû gelaên herêmê heye. Gel hewl dide destketiyên li dijî DAÎŞ’ê bi dest xistine biparêzin. Îro em bi kelecaneke mezin şiyarbûn û ji Îmraliyê deng hat. Bi Birêz Abdullah Ocalan re hevdîtin pêk hat. Em ji ser sînorê Kobanê jî silavan ji Birêz Abdullah Ocalan re dişînin. Divê bersivê bidin pêngava aştiyê û çareseriyê ya Birêz Abdullah Ocalan. Em ê bi xwedîderketina peyama Îmraliyê têkoşîna xwe mezin bikin.”
‘EM Ê KOBANÊ BI TENÊ NEHÊLIN’
Piştre Berdevkê Demî yê Platforma Ked û Demokrasiyê ya Amedê Ahmet Baran axivî û wiha got: “Kurdên Sûriyeyê ne bi tenê ne, em ê nehêlin ku Kurd li Sûriyeyê bibin qurbaniya terora cîhadîst. Mixabin Kurdên ku roleke aktîf lîstin. Di asayîşa herêmê de di dema ku DAÎŞ’ê hemû herêm terorîze kir, îro Kurdên Sûriyeyê ji alîyê hevalbendên xwe yên rojavayî ve di bin metirsîya êrîşên cîhadîstan de ne, divê ev êrîş bên rawestandin Divê pêvajoya muzakereyê di zûtirîn demê de dest pê bike. Çawa ku me duh jî li dijî terora DAÎŞ’ê hevgirtina xwe nîşan da, em ê Kobanê li hemberî komên terorîst ên ji çar aliyên cîhanê bi tenê nehêlin.”
‘LI DIJÎ ÊRÎŞAN DENGÊ XWE BILIND BIKIN’
Hevserokê Komela Wêjevanên Kurd Rêdûr Dîcle jî wiha got: “Em di pêvajoyeke dîrokî re derbas dibin. Hem hêzên hegemonîk û hem jî Tirkiye ji bo ji nû ve dîzaynkirina Sûriyeyê di nava hewldanê de ne. Hemû hêzên hegemonîk, bi taybet Tirkiye, Rêveberiya Xweser weke xetere dibînin û hewl didin êrîşî wê bikin. Di van êrîşan de sivîl û rojnamevan tên qetilkirin. Em weke nivîskar û rojnamevan li dijî êrîşên dagirkeriyê ne. Em bang li her kesî dikin ku li dijî êrîşan dengê xwe bilind bikin.”
‘EM DENG BIDIN BANGÊ RÊBER APO’
Parlamentera DEM Partiyê ya Rihayê Dîlan Kunt Ayan bal kişand ku sîstema jiyana hevpar a azad a li Bakur û Rojhilatê Sûriyeyê hatiye avakirin û got: “Netewe dewlet 100 sal in hewl didin gel tine bikin. Lê hesabên wan bi ser neketin. Dem dema yekbûnê ye, dem hatiye ku dengê xwe bilind bikin. Silav ji Birêz Abdullah Ocalan hat. Birêz Abdullah Ocalan diyar kir ku ew ê di aliyê erênî de tevkariya pêvajoyê vike. Em li vir bang dikin ku bi ruhê berxwedana Kobanê deng bidin vê bangewaziyê.”
Çalakî bi dirûşmeyên “Bijî berxedana Rojava”, “Silav, silav, ji Îmraliyê re hezar silav” û “Bijî Serok Apo” bi dawî bû.
