Komîsyona ku li ser pêvajoya aştî û demokratîkbûnê li meclisê dixebite, di civîna dawî de biryar girt ku ji 31’ê Kanûnê ve xebatên xwe du mehên din bidomîne.
Di civînê de, analîzên derbarê xebatên komîsyonê de hatin pêşkêşkirin û her wiha çawanî û çarçoveya rapora ku di pêvajoya amadekirinê de ye, hatin nîqaşkirin.
Endama DEM Partiyê Gulistan Kiliç Koçyîgît diyar kir ku yek ji armancên sereke yên komîsyonê afirandina binesaziya qanûnî ya ji bo aştiyê ye û anî ziman ku divê rapor bi aqil, aqilê hevpar û perspektîfek berfireh were nivîsandin. Koçyîgît bi bîr xist ku pêvajo hîn di qonaxa destpêkê de ye û ji bo avakirina aştiyek pozîtîf pîdivî bi nîqaşên berfireh heye.
Gulistan Kiliç Koçyîgît got, “Di vênoqteyê de em bi zelalî dibînin ku em hîn di destpêka pêvajoyê de ne û rêyek dirêj li pêşiya me ye. Analîz bi zelalî nîşan didin ku ji bo civakîbûn û pêşxistina pêvajoyê û bi taybetî ji bo avakirina aştiya pozîtîf pêdivî bi mekanîzmayên nû, beşdariya civakî ya nû û amûrên cûda hene. Ji ber vê yekê, em difikirin ku pêdivî bi nîqaşek berfireh li ser tiştê ku divê paşê were kirin heye.”
Gulistan Kiliç Koçyîgît wiha berdewam kir: “Pêvajoyek raporek berfireh a ku perspektîfa demokratîkbûnê digire nav xwe li pêşiya me ye.”
Endama DEM Partiyê Meral Daniş Beştaş jî diyar kir ku divê pirsgirêka Kurd bi eşkereyî were pênasekirin û danî ziman ku nêzîkatiyên ewlehiyê rê li ber bûçareseriyê vedikin. Meral Daniş Beştaş banga avakirina zimanê aştiya civakî û xwişk-biratiyê kir.
Meral Daniş Beştaş got, “Ev pirsgirêk bi çarçovekirina wê wekî ‘terorîzmê’ çareser nabe. Daxwaza ziman heye. Daxwaza ku ez dixwazim zimanê xwe bi awayekî azad biaxivim heye. Werin em wekî komîsyonê tenê hefteyekê zimanekî aştiya civakî ava bikin. Werin em zimanê xwişk-biratiyê ava bikin. Werin em li ser dîroka hevpar a vî welatî biaxivin. Werin em li ser noqteyên hevpar biaxivin. Ez îdia dikim ku atmosfer wê biguhere. Lê avakirina zimanekî dijber û xwe spartina wê nayê qebûlkirin.”
Endamê DEM Partiyê Sarûhan Olûç diyar kir ku ji bo aştiya civakî pêwîste hemû partî bê şert û merc li ser raporek hevpar li hev bikin û got, “Di gavên ji bo pêşerojê werin avêtin de lihevkirineke hevpar ji bo civakîbûna aştiyê pir girîng e.”
Endamê MHP’ê Fetî Yildiz dubare kir ku wê çar madeyên pêşîn ên destûrê ji nîqaşê re neyên vekirin.
Cîgirê Serokê Koma CHP’ê Murat Emîr diyar kir ku aştî ne tenê bi sererastkirinên qanûnî, di heman demê de bi serweriya darazê û xurtkitina edaletê pêkan e. Emîr anî ziman ku divê rapor hêviyê bide hemû beşên civakê û bal kişand ser girîngiya perspektîfa demokratîkbûnê.
