Seroka Yekîtiya Jinên Suryan ên Sûriyeyê Corcêt Barsom têkildarî jinedîtîhatina jinan a di pêvajoya avakirina Sûriyeyê de ji ANF’ê re axivî.
Corcêt Barsom işaret bi girîngiya beşdariya jinan a li pêvajoya nû ya siyasî kir û got, “Tinebûna jinan di vê pêvajoyê de tê wateya piştguhkirina mafên wan û avabûna pergaleke baviksalar. Ev yek jî li ser edalet û wekheviyê gefeke.”
Corcêt Barsom bi dewamî got, “Jinan li Sûriyeyê di her warî de destketiyên mezin bi dest xistin. Ji siyasetê heta çandê, ji civakî heta leşkerî gelek tişt bi dest xistin. Lê piştguhkirina jinan di vê pêvajoya hesas de rê li ber pirsgirêkên cidî vedike. Ji ber tu hikûmet bêyî beşdarbûna jinan nikare bê avakirin. Eger jin di hikûmetê de cih negirin, wê hemû biryarên ku ji bo Sûriyeyê werin girtin kêm bimînin.”
Corcêt Barsom di dawiya axaftina xwe de got, “Girîng e ku jinên Sûriyeyê di her qadê de bibin xwediyê dengê xwe û divê di hikûmetê de hebûna jinan derxînin pêş. Bereksê vê yekê, heger hemû gav bêyî jinan bên avêtin wê kêm bimînin û wê bêedaletî çêbibe.”
Barsom diyar kir ku wê di dawiya Konferansa Jinan de pêşniyarên ku piştgiriya temsîla jinan dikin bên kirin.
