Îro her kes bi kelecaneke mezin li benda banga dîrokî ya Rêber Apo ye. Jinên Kobanê der barê banga dîrokî ya Rêber Apo de ji ANF’ê re axivîn.
Cîhan Bozan, anî ziman ku ji ber daxuyaniya dîrokî ew gelek kelecanî ye û got, “Ev demeke dirêj e em li benda vê kêliyê ne. Şandeya DEM Partiyê îro berê xwe da Îmraliyê û dê daxuyana Rêber Apo ragihîne. Em ê daxuyaniya Rêber Apo bi hezkirin û kêfxweşiyek mezin pêşwazî bikin. Rêber Apo çi bibêje em ê li gorî wê tevbigerin.”
‘DIVÊ AZADIYA FÎZÎKÎ YA RÊBER APO BÊ MISOGERKIRIN’
Cîhan Bozan, diyar kir ku divê azadiya Rêber Apo ya fîzîkî bê pêkanîn û wiha domand, “Ne tenê ev daxuyanî, em dixwazin Rêberê xwe di aliyê fîzîkî de jî bibînin. Êdî em dixwazin bi Rêberê xwe re bi roj û şevê bijîn. Îro bi hezaran gelê Kobanê wê dakevin qadan û dengê Rêberê xwe guhdar bikin. Em ê heta dawiyê xwedî li Rêberê xwe derkevin. Ev doz doza me ye. Em ê xwedî li vê dozê derkevin û bibin bersiv ji dijminê hov re.”
Xanim Elî, jî da zanîn ku îro bi mîlyonan Kurd li benda daxuyaniya dîrokî ya Rêber Apo ne û got, “Ev 27 sal in Rêberê me dîlgirtiye. Di nava tecrîdeke giran de hat girtin. Tevî vê jî Rêber Apo berxwedaneke bêhempa raber kir û îro daxuyaniyeke dîrokî dide. Bi salan e hêviya me ew bû ku em agahiyek ji Rêber Apo bigirin. Hêviya me îro pêk tê. Ji bo azadiya Rêber Apo di aliyê fîzîkî de jî wê têkoşîna me bidome.”
Xanim Elî, got ku Rêber Apo çi bang bike, ew weke jin amade ne erkên xwe bi cih bînin û wiha domand, “Rêber Apo ji bo me ronahî ye û azadî ye. Bi saya Rêber Apo weke jin em bi hêz bûn. Em ê heta dawiyê xwedî li Rêberê xwe derkevin.”
