Li bajarê Sydney ê Awûstralyayê 8’ê Adarê bi coşeke mezin hate pîrozkirin. Çalakî piştî deqeyek rêzgirtin ji bo bîranîna şehîdên şoreşa Kurdistanê destpê kir. Piştî rêzgirtinê peyama Rêber Apo ya 8’ê Adarê hate xwendin.
“ÇARESERIYA AŞTÎ Û CIVAKA DEMOKRATÎK JI BO JINAN RONANSAN E”
Peyama ku “Banga Aştî û Civaka Demokratîk ji bo jinan jî Ronesans e” derket pêş, bi dirûşma ”Bijî Serok Apo” û “Jin, Jiyan, Azadî” hat pêşawazîkirin.
‘EM Ê JI BO AZADIYA RÊBER APO TÊKOŞÎNÊ MEZIN BIKIN’
Hevseroka DKTM’ê Ronahî Qendîl di axaftina xwe ya li ser wate û girîngiya rojê de got, “Em deyndarê Rêber Apo ne ku bi felsefeya Jin, Jiyan, Azadî jina Kurd a azad afirandiye û em anîne vê rojê. Bi mezinkirina berxwedanê em dikarin azadiya Rêber Apo misoger bikin û layiqî keda wî bin.” Qendîl destnîşan kir ku ew ê bi hemû hêza xwe piştgiriyê bidin pêngava çareseriyê ya ku Rêber Apo bi “Banga Civaka Demokratîk” daye destpêkirin.
Slayta ku ji nirxandinên Rêber Apo yên li ser 8’ê Adarê û têkoşîna azadiya jinê hatibû amadekirin hate pêşandan. Piştre Başak Dersîm derket ser dikê û helbesta “Li van erdnîgariyên ku mirina teqez tê ferzkirin ez ê bi her awayî ronahiyê biparêzim” xwend. Hunermend Hozan Xanemîr bi stranên xwe beşdaran coşand.
Pîrozbahiya bi coş bi gerandina govendê bi dawî bû.
