Prof. Nesrîn Nas diyar kir ku bi banga Rêberê Gelê Kurd re pêvajo hatiye astekî diyar, lê divê zelal pêşve biçe û got, “Divê ev pirsgirêk bikeve rojeva Meclîsê û bi avakirina komîsyonek re nexşerêya vê pêvajoyê bê derxistin.
Prof. Nesrîn Nas ya yek ji îmzekarên bangawaziya sernavê “Bêdengkirina çekan û destpêkirina pêvajoya aştî û demokrasiyê” ya di 14’ê Kanûna 2024’an de li Stenbolê hate parvekirin, derbarê banga Rêberê Gelê Kird Abdullah Ocalan û nîqaşên berdewam dikin de pirsên ANF’ê bersivand.
Nesrîn Nas ya bi bîr xist ew piştî gava Serokê Giştî yê MHP’ê Devlet Bahçelî ketine nava liv û tevgerê û herwiha metna ku weşandine ji bo îmzeyê vekirine û got ku ji bo pirsgirêka Kurd bi awayekî mayînde bê çareserkirin ketine nava hewildanek bi vî awayî û ji bo pêvajo bi aştiyê re encam bibe xebatên xwe berdewam dikin. Nesrîn Nas, diyar kir ku geşedanên tên jiyîn ji nêzîkatiyên di metna wan de cih digirin cudatir e û wiha got: “Baskê hikûmetê ji vê yekê re nabêje ‘pêvajo’. Ango dibêjin ev ne pêvajoyek aştî an jî çareseriyê ye. Ji vê yekê re dibêjin ‘Tirkiyeya bêteror’. Hikûmet dibêje ‘bila çekan berdin, werin û teslîm bibin’ û carna jî bigotîna ‘Yan hûn çekan deynîn an jî emê we bi çekên we defin bikin’ gef dixwin.”
DIVÊ EV MIJAR BIKEVE ROJEVA MECLÎSÊ
Nesrîn Nas, da zanîn bi banga Rêberê Gelê Kurd Abdullah Ocalan re pêvajo hat astekî diyar û diyar kir ku divê bi awayekî zelal bimeşe. Nesrîn Nas got, “Ocalan di pêvajoya çareseriyê ya beriya niha de jî balkişand li ser zelalbûnê û gotibû pêwîste meclîs bikeve nava tevgere, lêbelê ev pêvajo hêj ne zelal e. Em nizanin. Heta niha ji bilî ÎYÎ Partî tu partiyek ku koma wan di meclîsê de heye li dijî vê pêvajoyê derneketin. Pêwîste ev mijar bikeve rojeva meclîsê û bi avakirina komîsyonek re nexşerêya vê pêvajoyê bê derxistin. Her wiha ji bo civakîbûna mijarê jî, divê partiyên siyasî bikevin dewrê.”
DEM PARTÎ BI TENÊ TÊ HIŞTIN
Nesrîn Nas diyar kir ku civaka sivîl dikare pir tişt bike, lê pêwîstî bi agahiyên zelaltir heye û li gel civaka sivîl îşaret bi girîngiya siyaseta bisazitî kir. Nesrîn Nas fealiyeta DEM Partiyê ku ji bo civakîkirina pêvajoyê da destpêkirin, bi bîr xist û wiha got; “Hemû barê civakîkirina vê pêvajoyê li pişta DEM Partiyê maye. Partî tevî ku piştgiriyê didin jî ji ber ku naveroka pirsgirêkê nizanin, fehîtok nêz dibin. Dibêjin eger pirgirêkê bikeve Meclîsê, ew ê tiştê pêwîst bikin.”
Nesrin Nas got ku divê desthilatdarî dev ji polîtîkayên dijminîkirina muxalefetê berde û got ku divê pêvajo were zelal kirin û di vê mijarê de li Meclîsê komîsyonek were avakirin û wiha got: “Divê hemû partiyên muxalefetê, baro, sendîka, nivîskar, rûspî ji aliyekî nexşerêya ku wê derkeve holê bigrin û ji bo aştiyê hewl bidin.”
