Hêzên Artêşa Iraqê duh bi şev li taxa Yermûk a navenda bajarê Şengalê, êrîşî wesayiteke ku endamên Yekîneyên Berxwedana Şengalê (YBŞ) tê de bûn, kir û xwestin bajêr dorpêç bikin. Berxwedana gel ya li dijî dorpêçê berdewam dike.
Gelê Şengalê li ber avahiya Emîn El-Wetenî hatin ba hev û meş li dar xistin. Girseya gel di saetên êvarê de jî li ber avahiyê çalakiya rûniştinê li dar xist û agir vêxistin. Çalagerên ku piranî ji jinan û ciwanan pêktê wê sibê jî çalakiya xwe bidomînin.
Gelê Şengalê bang li Iraqê kir ku dawî li êrîşên xwe bîne, hêzên leşkerî yên bi şev şandine bajêr vekişîne û hurmetê nîşanî hêzên YBŞ-YJŞ’ê re bigre. Jinan jî ev peyam da, “Em ê ji vê têkoşînê paş de gavê neavêjin. Ji bo careke din xwîn neyê rijandin ger bê xwestin em ê şev û roj li qadê bin.”
