Federasyona Elewiyan a Demokratîk (FEDA), Federasyona Yekîtiyên Dersimê yên Demokratîk li Ewropayê (ADEF) û Kongreya Avakirinê ya Dersimê (DÎK) Festîvala Çandê ya Dersimê ya 15’emîn a li Ewropayê di navbera 30-31’ê Gulana 2025’an de li Rebstockpark a Frankfurtê lidar dixin.
Festîval wê ji bo xwedîderketina li dîrok, çand û nasnameya Dersimê bê lidarxistin.
Festîvala bi dirûşma ‘Ma xe Xorasan me, ne ki Tunceli! Ma Dersim e’ wê li dijî asîmîlasyon, înkarkirin, hilweşandina ekolojiyê ji bo xwedîderketina li hebûna civakî û çanda Dersimê pêk were.
Saziyên ku çalakiyê lidar dixin, bal kişandin ser polîtîkayên zordariyê ya dewleta Tirk a li ser xelkê Dersimê û li dijî vê yekê banga tevlîbûneke xurt a ji bo festîvalê kirin.
Di daxuyaniyê de hate gotin, “Narkotî, qumar û fûhûş weke versiyona nûjen a Plana Şark Islahat li dijî ciwanên Dersimê tê bikaranîn” û hate ragihandin ku bi bendav û madenkariyê jî xwezaya Dersimê tê talankirin.
Di festîvalê de wê nirxên çandî û dîrokî yên Dersimê bêne destnîşankirin û gelek hunermend, nivîskar û rewşenbîr wê tevlî bibin. Di festîvalê de stranên bi zimanê dayikê wê bêne gotin û mîrateya çandî ya Dersimê ji nifşên nû re bê ragihandin.
Komîteya festîvalê bang li Dersimiyan û dostên wan kir ku piştevaniyê bikin û weke Mûnzûrê biherikin, li Frankfurtê li hev kom bibin.
