Rûsyayê di Sibata 2022’an de bi hêviya ku serketineke bi lez bi dest bixe dest bi dagirkeriya li ser Ûkraynayê kir. Lê belê Ûkraynayê ku piştgirî ji welatên Rojavayî wergirt, bi berxwedana xwe şer veguherand şerekî bêzarkirinê yê demdirêj.
Fermandarê hêzên Dewletên Yekbûyî yên Emerîkayê yê li Ewropayê General Christopher Cavoli roja Pêncşemê li komîteya Senatoyê daxuyanî da û got, “Rûsan zêdeyî 4 hezar tankên xwe winda kirin. Ev yek bi qasî rezervên DYE’yê ye.” Cavoli got, “Asta vî şerî gelekî balkêş e û matmayî ye.”
Dewletên Yekbûyî yên Emerîkayê ji dema destpêkirina şer û pê ve bi dehan milyar dolarî alîkariya leşkerî ji Ûkraynayê re kir, lê belê piştî ku Donald Trump di 20’ê Çileyê de dest bi wezîfeyê kir, ji hingî ve alîkariyeke nû ranegihand.
Destpêka meha Adarê li Qesra Spî di navbera Donald Trump û hempîşeyê wî yê Ûkraynayî Volodimir Zelenskiy de nîqaşeke tund rû dabû û DYE’yê alîkariya leşkerî û îstîxbaratî sekinandibû.
General Cavoli anî ziman ku ji bo fuzeyên Rûs bêne îmhakirin pêwîstiya artêşa Ûkraynayê bi alîkariya Washingtonê heye, her wiha ji bo tespîtkirina hedefên lojîstîk û qadên fermandariyê yên Rûs ên bibin hedef, pêwîstiya xwe bi alîkariya îstîxbaratê heye.
Ji bo pirsa, eger DYE alîkariyên nû bisekinîne ev yek wê bandoreke çawa li ser kapasîteya şer a Ûkraynayê bike, Cavoli got, “Eşkere ye ku wê bandoreke giran û bi lez li ser hêza wan a şer bike.”
