Berdevkê Serokatiya Dewletê ya Rûsyayê Dmitriy Pesko ji AFP’ê re axivî û got, “Hemû alî divê teqez bi xwînsarî û berpirsyarane tevbigerin û giraniyên bidin ser hewldanên dîplomatîk.”
Peskov got, “Pirsgirêka nukleerê ya Îranê tenê divê bi rêyên siyasî û dîplomatîk bê nîqaşkirin û çareserkirin.”
Li gorî hêzên rojavayî, Îran hevkarekî girîng ê Rûsyayê ye û ji bo hewldanên leşkerî yên li Ûkraynayê balafirên bêmirov û fuze da Rûsyayê.
Serokê DYE’yê Donald Trump roja Pêncşemê daxuyaniyek da û diyar kir ku ji bo peymaneke nû ya nukleerî ya bi Îranê re ew alîgirê ‘danûstandinên yekser’ e, lê belê gefa ‘bombekirin’ û destwerdana leşkerî jî xwar.
Îranê beriya niha bi demeke kurt ragihandibû ku heta DYE nêzîkatiya xwe ya li hemberî wan neguherîne, ew ê alîgirê danûstandinên neyekser bin.
Donald Trump sala 2018’an dema ku dest bi wezîfeyê kir, bi rengekî ji nişka ve DYE ji peymana navneteweyî ya bi Îranê re vekişandibû. Îranê jî gav bi gav sozên têkildarî peymana nukleerê dabû betal kiribû.
Trump ji aliyekî ve dibêje ew alîgirê diyalogê ye ji bo kontrolkirina karên nukleerî yên Îranê, li aliyê din jî gefên li ser destwerdana leşkerî dixwe.
