Li hemberî girtina Şaredarê Bajarê Mezin ê Stenbolê (ÎBB) Ekrem Îmamoglû, nerazîbûn dewam dike. Bi girtina Îmamoglû re yek ji nîqaşên ku di çalakiyên şermezarkirinê de destpê kirin girîngiya xeta têkoşîna hevpar a li hemberî zordariya desthilatdariya AKP’ê bû.
Seroka Giştî ya Partiya Kedkaran a Sosyalîst (SEP) Guneş Gumuş operasyona li hemberî Îmamoglû û têkoşîna hevpar ji ANF’ê re nirxand.
Guneş Gumuş anî ziman ku operasyona li hemberî Îmamoglû darbeyeke desthilatdariya AKP-MHP’ê ya li hemberî rêveçûna demokratîk e û got, “Pirsgirêk êdî CHP û Îmamoglû nîne. Zehmet xuya dike ku desthilatdariya AKP-MHP’ê careke din di hilbijartinê de bi ser bikeve, bi taybetî li pêşberî namzetên xurt ên weke Îmamoglû. Jİ ber vê yekê darbe li rêveçûna demokratîk a bi hilbijartinê kir.
Li gorî vê yekê, darbe wê bi girtina Îmamoglû nemîne, wê gihîştibûya heta tayînkirina qeyûm li ser ÎBB û CHP’ê. AKP ji aliyekî ve tola hilbijartinên xwecihî yên 31’ê Adara 2024’an hiltîne ku têk çûbû. Bi vî rengî dixwaze nehêle çavkaniyên cemaweriyê ji aliyê CHP’ê ve bêne bikaranîn. Ev pêla zextê bi seferberiya girseyî ya mezin vê gavê hate şikandin, lê belê hîn jî hesas e.”
Guneş Gumuş ragihand ku bi operasyona li hemberî Îmamoglû re desthilatdarî dixwaze DEM Partiyê ji partiyeke muxalefetê dûr bixîne, gelê Kurd jî bê alî bihêle û got, “Dixwazin di navbera girseya DEM Partî û CHP’ê û girseya çep de bêbaweriyê biafirîne û vê kûr bike. Ev operasyon ji şexsê Îmamoglû wêdetir tê wateyekê. Di navbera me û CHP, Îmamoglû de cudahiyên me yên bingehîn hene, lê belê eger ev darbe bi ser bikeve wê rejîmeke otorîter bi cih bibe ku hingî ti wateya hilbijartinê li welêt nemîne. Wezîfeyeke lezgîn e ku li hemberî vê darbeyê çalakiyên şermezarkirinê yên xurt û girseyî bêne birêxistinkirin.”
Guneş Gumuş işaret bi girîngiya nerazîbûna ciwanan kir û got, “Divê ev têkoşîn weke ku bi dawî bûye neyê dîtin. Divê bi rê û rêbazên nû nerazîbûn dewam bike û bê birêxistinkirin.”
Guneş Gumuş destnîşan kir ku dem dema rabûna li dijî faşîzmê ya bi rengekî hevgirtî ye û got, “Dem ew dem e ku ji sendîkayan heta bi partiyên siyasî û rêxistiniyên girseyî yên demokratîk bibin yek û têkoşîna girseyî bê bilindkirin.”
